काठमाडौँ / साताको अन्तिम कारोबार दिन बिहीबार नेप्से परिसूचकले  ४ बर्षअघि बनाएको रेकर्ड तोड्दै ऐतिहासिक रेकर्ड कायम गरेको छ । 

बजारमा नयाँ कीर्तिमान कायम भएपछि लगानीकर्ताहरु उत्साहित देखिएका छन् । ४ बर्षअघि सबैभन्दा बढी १८८१ बिन्दुमा पुगेको नेप्से परिसूचकले पुनः लय समातेको छ । बिहीबार नेप्से १८.४३ अंकले बृद्धि भएर एक हजार ८९३.२५ बिन्दुमा उक्लिएको छ । 

त्यस्तै, साताको पहिलो दिन आइतबार हालसम्मकै उच्च ६ अर्ब ९० करोड रुपैयाँ माथिको कारोबार भई बनाएको नयाँ रेकर्ड आज बिहीबार तोडिएको छ । यसदिन हालसम्मकै सर्वाधिक बढी ७ अर्ब ६१ करोड ३० लाख ३० हजारबढीको कारोबार भएको छ ।
 
आज नेप्सेमा सूचीकृत कम्पनीहरुको बजार पुँजीकरणमा अर्को रेकर्ड कायम भएको छ । यसदिन नेप्सेमा सूचिकृत २०१ ओटा कम्पनीको शेयर ७० हजार ३ पटक व्यापार भएको छ भने कारोबार अवधिभर कूल एक करोड ७१ लाख ८८ हजार ९९९ कित्ता शेयर कारोबार भएको छ ।

बिहीवार कारोबार रकमसँगै कारोबार कित्ता र व्यापार पटकले नै ऐतिहासिक रेकर्ड राखेको हो ।

लगातार बढेको नाफा बुक गर्नेहरु सक्रिय रहँदा बजारमा उतारचढाव देखिएको छ । यसदिन कारोबारमा आएका  पाँच ओटा समूहबाहेक सबैं समूहको परिसूचकमा गिरावट आएको छ । बढेको समूहअन्तर्गत बैंकिङ समूहको परिसूचक सर्वाधिक ३७.७६ अंकले बृद्धि भएको छ ।

त्यस्तै, हाइड्रो पावर समूहको ६.६२ अंक, अन्य समूहको १५.३६ अंक, उत्पादन तथा प्रशोधन समूहको ०.०९ अंक र म्युचुअल फण्ड समूहको ०.०७ अंकले बढेको छ ।

त्यस्तै, व्यापारिक समूहको परिसूचक १३०.६६ अंकले घटेको छ भने निर्जीबन बीमा समूहो १६५.०१ अंक, जीवन बीमाको १३४.३२ अंकले घटेको छ । विकास बैंकको ८.३५ अंक, वित्तको ५.८७ अंक र होटल समूहको ४३.६५ अंकले परिसूचक ओरालो लागेको छ । 

सेयरमूल्य बढेका / घटेका कम्पनीहरु 
बिहीबार कारोबारमा आएका कम्पनीहरुमध्ये एनएमबि माइक्रो फाइनान्स वित्तीय संस्थाको शेयरमूल्य सर्वाधिक बढी १० प्रतिशतले बृद्धि भएको छ । उक्त कम्पनीको शेयरमूल्य प्रतिकित्ता ९९ रुपैयाँले बृद्धि हुँदा अन्तिम मूल्य एक हजार ८९ रुपैयाँ कायम भएको छ । 

त्यस्तै, पाँचथर पावरको शेयरमूल्य ९.९५ प्रतिशत अर्थात प्रतिकित्ता २२ रुपैयाँले बृद्धि भई अन्तिम मूल्य २४३ रुपैयाँ कायम भएको छ । त्यसैगरी हिमालयन उर्जा विकास कम्पनीको लगानीकर्ताहरुले ९.७९ प्रतिशत र आँखुखोला जलविद्यतु कम्पनीका लगानीकर्ताहरुले पनि ९.५९ प्रतिशतले नाफा कमाएका छन् । 

आजको कारोबारमा व्यापार समूह अन्तर्गतको साल्ट ट्रेडिङ कर्पोरेसनको शेयरमूल्य सर्वाधिक बढी ६.१८ प्रतिशतले घटेको छ । उक्त कम्पनीका लगानीकर्ताहरुले प्रतिकित्ता ४९४ रुपैयाँका दरले नाफा गुमाउदा कम्पनीको अन्तिम शेयरमूल्य प्रतिकित्ता ७ हजार ५०६ रुपैयाँ कायम भएको छ ।

त्यस्तै, न्याग्दी ग्रुप पावर, बोटलर्स नेपाल र सांग्रिला डेभलपमेन्ट बैंकको शेयरमूल्यमा पनि आज ५ प्रतिशतभन्दा बढीले गिरावट आएको छ । 

सर्वाधिक कारोबार गर्ने कम्पनीहरु 
बिहीबारको कारोबार रकममा नेपाल पुनर्बीमा कम्पनीको सर्वाधिक बढी हिस्सा रहेको छ । ७ अर्ब ६१ करोड माथिको कारोबार रकममा कूल ५८ करोड १३ लाख १७ हजार रुपैयाँको योगदान उक्त कम्पनीको रहेको हो । 

यसैगरी नविल बैंकको ३८ करोड ३४ लाख ४१ हजार रुपैयाँमाथिको कारोबार भएको छ भने शिवम् सिमेन्टको कारोबार रकम २८ करोड ९१ लाख ९५ हजार रुपैयाँ रहेको छ । 

नेपाल दुरसञ्चार कम्पनीको आजको कारोबार रकम २८ करोड २७ लाख ३८ हजारबढीको रहेको छ भने नेपाल बैंकको कारोबार रकम २५ करोड ५१ लाख ६८ हजार रुपैयाँभन्दा बढी रहेको छ ।