काठमाडौँ / रिलायबल नेपाल लाइफ इन्स्योरेन्स कम्पनीको प्रमुख कार्यकारी अधिकृत (सिइओ)मा नारायण बाबु लोहनीले पुनः नियुक्ति पाएका छन् । कम्पनीको यही साउन १ गते बसेको सञ्चालक समितिको बैठकले लोहनीलाई दोस्रो कार्याकालको लागि सिइओमा नियुक्त गरेको हो ।
सिइओ लोहनीको नेतृत्वमा कम्पनीले संस्थागत सुशासन, उच्चतम प्रविधिको प्रयोग, अभिकर्ताहरूको वृहत सञ्जाल बनाई, लगानीको विविधीकरण गरी नेपाली बीमा कम्पनीहरूबीच खरो उत्रने लक्ष्य लिएको सूचना अधिकृत दिपेश बाबु तिवारीले बताए ।
हाल कम्पनीको ८२ ओटा शाखा कार्यालयहरू रहेका छन् भने कम्पनीले एजेन्सी कार्यालयहरूमार्फत देशभर ३२ लाखभन्दा बढीलाई सेवा प्रवाह गर्दै आइरहेको छ ।
२०६४ मंसीर १८ गते पब्लिक लिमिटेड कम्पनीको रूपमा कम्पनी रजिष्ट्रको कार्यालयमा दर्ता भएको रिलायबल नेपाल लाइफ इन्स्योरेन्स कम्पनीले बीमा समितिबाट २०७४ साउन १८ गते कारोबार गर्न इजाजत पत्र पाएको थियो । त्यस्तै, २०७४ भदौ १५ गतेदेखि जीवन बीमा सम्बन्धी कार्य गर्न बीमा समितिबाट स्वीकृति प्राप्त गरेसँगै कम्पनीले आफ्नो सेवा सुचारु गरेको हो ।