काठमाडौँ / नेपाल राष्ट्र बैंकले ६ महिनासम्मको आर्थिक तथा वित्तीय स्थिति सार्वजनिक गरेको छ । जसअनुसार वार्षिक बिन्दुगत आधारमा उपभोक्ता मूल्य सूचकाङ्कमा आधारित मुद्रास्फीति ५.४१ प्रतिशत रहेको छ । चालु आवको ६ महिनामा आयात ७.१ प्रतिशतले र निर्यात ३१.८ प्रतिशतले बढेको छ ।

त्यस्तै, विप्रेषण आप्रवाह नेपाली रुपैयाँमा ४.१ प्रतिशतले र अमेरिकी डलरमा १.१ प्रतिशतले बढेको राष्ट्र बैंकले जनाएको छ । यसैगरी, शोधनान्तर स्थिति २४९ अर्ब २६ करोडले रुपैयाँ बचतमा रहेको छ ।

कुल विदेशी विनिमय सञ्चिति अमेरिकी डलरमा १६ अर्ब ८४ करोड पुगेको छ । पुस मसान्तसम्म नेपाल सरकारको खर्च ६६७ अर्ब ६० करोड रुपैयाँ र राजस्व परिचालन ५५९ अर्ब ६१ करोड रुपैयाँ रहेको छ ।

विस्तृत मुद्राप्रदाय ३.९ प्रतिशतले बढेको छ । वार्षिक बिन्दुगत आधारमा यस्तो मुद्राप्रदाय १०.२ प्रतिशतले बढेको छ । त्यस्तै, बैंक तथा वित्तीय संस्थाको निक्षेप सङ्कलन ३.७ प्रतिशतले र निजी क्षेत्रमा प्रवाहित कर्जा ५.२ प्रतिशतले बढेको छ ।

वार्षिक बिन्दुगत आधारमा निक्षेपको वृद्धिदर ९.९ प्रतिशत र निजी क्षेत्रमा प्रवाहित कर्जाको वृद्धिदर ७.० प्रतिशत रहेको छ ।