काठमाडौँ / नेकपा माओवादी केन्द्रसहित ९ वटा दलबीचको एकता घोषणा बुधबार बिहान ११ बजे काठमाडौँको भृकुटीमण्डपमा हुने भएको छ। 

माओवादी केन्द्रका नेता अग्नि सापकोटाले एकताका लागि सहमति पत्रमा हस्ताक्षर भएका दलहरूले संयुक्त रूपमा नयाँ पार्टी ‘नेपाली कम्युनिस्ट पार्टी’को नाममा काम गर्ने जानकारी दिएका छन्।

सापकोटाका अनुसार एकीकृत पार्टीले जनताको चाहना अनुसार नीति तथा कार्यक्रम निर्माण गर्नेछ। उनले भने, “अहिलेसम्मका उतार–चढाव, घुम्ती र मोड पार गर्दै अब देश समृद्धिको मार्गमा अघि बढ्ने हामीले विश्वास गरेका छौँ।” 

उनले तत्काल माओवाद सिद्धान्त छाडे पनि माओका योगदानका सवालमा सजीव छलफल गरी पुनर्स्थापित गर्न सकिने सम्भावना पनि औँल्याए।

नेकपा माओवादी केन्द्र विभाजित भएपछि पार्टीका पूर्वउपमहासचिव जनार्दन शर्मा ‘प्रभाकर’, पूर्वसचिव राम कार्की, पूर्व स्थायी समिति सदस्य अञ्जना विशुंखे लगायतले पार्टी छोडेर नयाँ राजनीतिक अभियान सुरु गरेका छन्। 

मङ्गलबार ललितपुरमा आयोजित पत्रकार सम्मेलनमा शर्माले आफ्ना विगतका कमजोरी स्वीकार गर्दै अब इमान्दारीका साथ नयाँ अभियानमार्फत सङ्कल्प पूरा गर्ने प्रतिबद्धता व्यक्त गरे।

यसैबीच, नेकपा माओवादी केन्द्रका संयोजक पुष्पकमल दाहाल ‘प्रचण्ड’ले पार्टी छोडेका शर्मालाई पनि एकता प्रक्रियामा समाहित हुन आह्वान गरेका छन्। 

सापकोटाका अनुसार प्रचण्डले शर्मा, भीम रावल, झलनाथ खनाल, घनश्याम भूसालसहितका नेताहरूसँग संवाद गर्दै सबै लोकतन्त्रवादी शक्तिलाई देशभक्तिपूर्ण आन्दोलनमा एकजुट हुन आग्रह गरेका हुन्।

हालसम्म झलनाथ खनाल र घनश्याम भूसालले एकता प्रक्रियामा नआउने संकेत गरेका छन्। तर, माओवादी केन्द्रले एकीकृत समाजवादीसहित ८ दलसँगको सहमति अनुमोदन गरिसकेको छ। सापकोटाले एकीकृत पार्टी कम्युनिस्ट आन्दोलनको मूलधारको रूपमा विकास हुने विश्वास व्यक्त गरे।