काठमाडौं / नेकपा (एमाले) विवाद मिलाउन दुबै पक्षको ५–५ जनाको वार्ता टोली गठन गरिएको छ ।
लामो समय देखि खड्किएको विवाद मिलाउन आज आइतबार सिंहदरबारमा एमाले अध्यक्ष केपी ओली र वरिष्ठ नेता माधव कुमार नेपालबीच छलफल भएको थियो ।
ओली र नेपालको वान टु वान वार्तापछि नेता माधव नेपालले ३ दिनभित्र वार्ता टोलीले पार्टी विवादका सन्दर्भमा प्रतिवेदन बुझाउनुपर्ने धारणा राखेका छन् । प्रधानमन्त्री ओली एमाले जेठ २ को आधारलाई जान तयार भएपछि एमाले विवाद मत्थर हुँदै गएको हो ।
गत शुक्रबार दुवैतर्फका नेतासहित छलफल गरेका अध्यक्ष ओली र वरिष्ठ नेता नेपालले आज त्यसैलाई निरन्तरता दिँदै वार्ता टोलीको टुंगो लगाएका हुन् ।
ओली पक्षबाट सुवास नेम्वाङको नेतृत्वमा विष्णु पौडेल, प्रदीप ज्ञवाली, शंकर पोखरेल र विष्णु रिमाल रहेका छन् ।
त्यस्तै, नेपाल समूहबाट भीम रावलको नेतृत्वमा घनश्याम भुसाल, गोकर्ण विष्ट, सुरेन्द्र पाण्डे र रघुजी पन्त रहेका छन् ।
