काठमाडौँ / नेपालमा पहिलो पटक बुक विल्डिङ विधिबाट आइपिओ जारी गर्ने तयारीमा रहेको सर्वोत्तम सिमेन्टले असारमा विशेष साधारणसभा गर्ने भएको छ ।
लाभांश प्रस्ताव पारित गर्ने तयारीका साथ कम्पनीले यही असार १० गते विशेष साधारण सभा बोलाएको हो । कम्पनीको काठमाडौं–३२ तीनकुनेमा रहेको न्यौपाने टावरमा विहान ११ बजे विशेष साधारणसभा हुने भएको छ ।
चुक्तापूँजी वृद्धि गरी संस्थापक र सर्वसाधारण शेयरधनीहरुबीचको पूँजीको अनुपात मिलान गर्न तयारी गरिरहेको कम्पनीको सो विशेष सभामा लाभांश प्रस्ताव पेश गरिने बताइएको छ ।
उक्त विशेष साधारण सभामा कम्पनीले हाल कायम चुक्तापूँजी ३ अर्ब ४० करोड रुपैयाँको आधारमा १९.११८ प्रतिशत बोनस शेयर र १ प्रतिशत नगद (त्यसमा लाग्ने कर वापत)लाभांश प्रदान गर्ने प्रस्ताव प्रस्तुत गर्ने भएको छ । बोनस सेयर पारित भएपछि कम्पनीको चुक्ता पुँजी ६५ करोड रुपैयाँले बृद्धि हुने छ भने चुक्ता पुँजी ४ अर्ब ५ करोड कायम हुनेछ।
आईपीओ विक्रीका लागि कम्पनीले चैत ४ गते विक्री प्रबन्धकमा ग्लोबल आइएमई क्यापिटललाई नियुक्त गरेको थियो । त्यस्तै सहायक विक्री प्रबन्धकमा प्रभु क्यापिटल र एनआईबिएल एस क्यापिटललाई नियुक्त गरेको छ ।
कम्पनीले नेपालको धितोपत्रको इतिहासमै पहिलो पटक लागू भएको यस विधिबाट ६० लाख कित्ता आइपिओ सर्वासधारणमा बिक्री गर्न लागेको हो ।
सिमेन्ट उद्योगको गत पुस ८ गते बसेको सञ्चालक समितिको बैठकले आइपिओ निष्काशन गर्ने प्रस्ताव गरेको थियो ।
कम्पनीले कूल कित्तामध्ये संस्थागत लगानीकर्ताहरूका लागि २४ लाख कित्ता, उद्योग प्रभावित स्थानीय लागि ८ लाख कित्ता र कम्पनीका कर्मचारीसहित सर्वसाधारणमा २८ लाख कित्ता आइपिओ छुट्याएको छ ।
हालसम्मको अभ्यासअनुसार आइपिओको अंकित मूल्य एक सय रुपैयाँ भए पनि बुक विल्डिङ विधिबाट संस्थागत लगानीकर्ताहरूको मूल्याङ्कनका आधारमा कम्पनीको शेयरमूल्य तय हुनेछ ।
कम्पनीले आन्तरिक मूल्याङ्कन गर्दा प्रतिकित्ता ७५० भन्दा बढी मूल्य कायम बताउदै आएको छ ।
कम्पनीको जेठ २५ गतेको सञ्चालक समितिको बैठकले विशेष साधारण सभा गर्ने निर्णय गरेको थियो ।
नवलपरासीमा उद्योग रहेको सर्वोत्तम सिमेन्टको खानी पाल्पामा छ। चितवनको चुनढुङ्गा मिश्रणबाट उत्पादित क्लिंकर (धातुमल सिमेन्ट) देशका अन्य २० वटा उद्योगहरुले खरिद गर्ने गरेका छन् ।
यस उद्योगको वार्षिक उत्पादन क्षमता १०२५ करोड बोरा रहेको कम्पनीको दाबी छ । सर्वोत्तम सिमेन्टले सर्वोत्तम ग्रिन ओ. पि. सि. सिमेन्ट र सर्वोत्तम ग्रिन पि. एस. सि. सिमेन्ट उत्पादन गरिरहेको छ ।
युरोपियन भि. आर. एम. मेशिनबाट उत्पादित सर्वोत्तम सिमेन्ट नेपाल कै एकमात्र पहिलो ४५०० ब्लेनसम्मको मसिनोपन भएको सिमेन्ट उत्पादन गर्दै आएको छ ।
