काठमाडौँ / मध्यभोटेकोशी जलविद्युत कम्पनी लिमिटेडले बैशाख २१ गतेदेखि आयोजना प्रभावित स्थानीयका लागि प्राथमिक शेयर (आइपिओ) जारी गर्ने भएको छ । कम्पनीले सोमबार प्रकाशित गरेको सूचना अनुसार कम्पनीले जारी गर्ने कूल ६० लाख कित्तामध्ये आयोजना प्रभावितका लागि आइपिओ जारी गर्ने भएको हो ।
कुल कित्तामध्ये सिन्धुपाल्चोक जिल्लाको भोटेकोशी गाउँपालिका वडा नं. (साविक लिस्ती गाविस र मार्मिङ गाविस) १ र ५ , बाहृविसे नगरपालिका वडा नं. ५ र ६ (साविक गाती गाविस) तथा बाहृविसे नगरपालीका वडा नं. ७ र ८ (साविक घुमथाङ गाविस र मानेश्वरा गाविस) का वासिन्दाका लागि ३० प्रतिशत दरको १८ लाख कित्ता र माथि उल्लेखित स्थानिय बाहेक सिन्धुपाल्चोक जिल्लाका अन्य स्थानियका लागि ७० प्रतिशतका दरले ४२ लाख कित्ता शेयर जारी गर्ने भएको हो ।
स्थानीय बासिन्दाका लागि १०० रुपैयाँ अंकित दरको उक्त आइपिओ छिटो मिति जेठ २ गतेसम्म खरिदका लागि आवेदन दिन सकिनेछ भने उक्त समयमा पर्याप्त आवेदन नपरेको खण्डमा ढिलो मिति जेठ २० गतेसम्म आवेदन दिन सकिनेछ ।
कम्पनीको आइपिओ बिक्रीका लागि ग्लोबल आइएमई क्यापिटल बिक्री प्रबन्धक रहेको छ । सार्वजनिक रूपमा निष्काशन गर्न लागिएको साधारण शेयरका लागि क्रेडिट रेटिङ्ग संस्था केयर रेटिङ नेपालबाट केयर एनपि बिबि प्रमाणपत्र प्राप्त गरेको कम्पनीले जनाएको छ । उक्त रेटिङले कम्पनीको दायित्व वहन गर्ने क्षमतामा औसत जोखिम रहेको जनाउँछ ।
यसअघि कम्पनीले कर्मचारी सञ्चयकोषका सञ्चयकर्ता, संस्थापक कम्पनी तथा ऋणदाता कम्पनीका कर्मचारीहरूका लागि १ करोड ४४ लाख कित्ता आइपिओ बिक्री गरिसकेको छ ।
कम्पनीले पहिलो चरणमा १० प्रतिशत दरको उक्त शेयर आयोजना प्रभावितमा विक्री गरेपछि दोस्रो चरणमा १५ प्रतिशतका दरले ९० करोड बराबरको ९० लाख कित्ता आम सर्वसाधारणमा विक्री गर्नेछ ।
कम्पनीले कर्मचारीहरुका लागि विक्री गरेको कुल कित्तामध्ये कर्मचारी सञ्चय कोषका सञ्चयकर्ताको लागि १ करोड १७ लाख कित्ता, संस्थापक संगठित संस्था (चिलिमे जलविद्युत कम्पनी, नेपाल विद्युत प्राधिकरण, सिन्धुपाल्चोक हाइड्रोपावर कम्पनी, सिन्धु इन्भेष्टमेण्ट कम्पनी, नेपाल अरनिको हाइड्रोपावर कम्पनी र सिन्धु भोटेकोशी हाइड्रोपावर)का कर्मचारीहरुका लागि २१ लाख कित्ता र ऋणदाता संस्था कर्मचारी सञ्चय कोषका कर्मचारीका लागि ६ लाख कित्ता छुट्याएको थियो ।
