काठमाडौँ / सरकारले यस वर्षको धान दिवस चितवनको बछौलीमा मनाउने भएको छ ।
आज राजधानी काठमाडौँमा पत्रकार सम्मेलन गर्दै कृषि तथा पशुपन्छी विकास मन्त्रालयले यस बर्षको धान दिवस चितवनको बछौलीमा मनाउने जानकारी दिएको हो ।
“जलवायु मैत्री कृषि, धान उत्पादनमा वृद्धि” यस वर्ष धान दिवसको मूल नारा रहेको छ । जलवायु परिवर्तनको कारण धान खेतीमा बढ्दो नकरात्मक असरलाई न्यूनीकरण गर्न जलवायु अनुकूलित प्रविधिहरुको अनुसन्धान र विकास एवं उपलव्ध प्रविधिहरुको प्रचार प्रसार गरी तिनको अवलम्वन गर्न कृषक र अन्य सम्वद्ध पक्षहरुलाई सचेत र जागरुक बनाई धान उत्पादन एवं उत्पादकत्व बढाउनु पर्ने सन्देश यस वर्षको नाराले दिएको मन्त्रालयले जनाएको हो ।
धान दिवसको पूर्वसन्ध्या (शुक्रबार) मा नेपाल कृषि अनुसन्धान परिषद (नार्क) मा राष्ट्रिय योजना आयोगको कृषि क्षेत्र हेर्ने सदस्यहरुको आतिथ्यमा इन्टरनेसनल राइस रिसर्च इन्सिच्युट (इरी) र बीआरआरआईको प्रतिनिधित्व हुने गरी अन्तरक्रिया कार्यक्रमको आयोजना गरिएको छ ।
९.८ प्रतिशत रोपाइँ सम्पन्न
कृषि विभागका महानिर्देशक डा.नरहरिप्रसाद घिमिरेका अनुसार यो वर्षको असार १२ गतेसम्ममा मुलुकभर ९.८ प्रतिशत धान रोपाइँ सम्पन्न भएको छ । गत वर्ष असार १० सम्म ८.७५ प्रतिशत रोपाइँ भएकोमा यस बर्ष खेतीयोग्य जमिनमध्ये देशभर ९.८ प्रतिशत धान रोपाइँ भएको उनले बताए ।
मुलुकभर १३ लाख ९८ हजार ८ सय ३६ हेक्टर क्षेत्रफलमा रोपाइँ हुन्छ । सो क्षेत्रफलमध्ये असार १२ गतेसम्म ९।८ प्रतिशत अर्थात एक लाख ३६ हजार ४११।५ हेक्टरमा मात्रै रोपाइँ भएको मन्त्रालयले जनाएको छ ।
गत बर्ष असार १० गतेसम्मको अवधिको तुलनामा रोपाइँ करिब १.०५ प्रतिशत विन्दुले बढी हो । पोहोर २०८० असार १० गतेसम्म ८.७५ प्रतिशत रोपाइँ भएको मन्त्रालयले जानकारी दिए ।
प्रतिशतको हिसाबमा सबैभन्दा बढी सुदूरपश्चिम प्रदेशमा रोपाई सम्पन्न भएको देखिएको छ । असार १२ गतेसम्ममा यस प्रदेशमा २५ प्रतिशत अर्थात एक लाख ७४ हजार ५ सय ७६ हेक्टरमा रोपाइँ भएको छ ।
त्यसपछि क्रमशः कर्णाली प्रदेशमा २३.९ प्रतिशत, बाग्मती प्रदेशमा १८.३ प्रतिशत, लुम्विनी प्रदेशमा ८.८ प्रतिशत, गण्डकी प्रदेशमा ८.३ प्रतिशत, कोशी प्रदेशमा ५.६ प्रतिशत र मधेश प्रदेश २.९ प्रतिशत रोपाई सम्पन्न भएको तथ्याङ्कमा उल्लेख गरिएको छ ।
कतिको हुन्छ आयात ?
गत जेठ मसान्तसम्म धानको बीउ ८८ करोड ६५ लाख २१ हजार रुपैयाँबराबरको २१ लाख ७ हजार २ सय ३३ किलो धानको बीउ, ११ अर्ब ५५ करोड २५ लाख ७९ हजार रुपैयाँबराबरको ३० करोड ५३ लाख १० हजार ५ सय २० किलो, ८ अर्ब ६९ करोड ६ सय ८५ रुपैयाँबराबरको ८ करोड २७ लाख ६९ हजार ९ सय ८९ किलो चामल र ९ लाख २० हजार रुपैयाँबराबरको २१ हजार १ सय २४ किलो कनिका आयात भएको विभागले जनाएको छ ।
