काठमाडौँ / मनसुनको अन्त्य नजिकिएसँगै देशभर ९२.४ प्रतिशत रोपाईं सम्पन्न भएको छ ।
कृषि तथा पशुपन्छी विकास मन्त्रालयले सार्वजनिक गरेको तथ्याङ्क अनुसार यस वर्षको करिब दुई महिनाको अवधिमा (साउन १३ गतेसम्म) देशभर ९२.४ प्रतिशतको हाराहारीमा बर्खे धानवालीको रोपाइँ सम्पन्न भएको हो ।
अघिल्लो वर्षको साउन १२ गतेसम्ममा ७८.१ प्रतिशतको हाराहारी मत्रै रोपाइँ भएको थियो । यस बर्ष १३ लाख ९८ हजार २७३ हेक्टर क्षेत्रफलमध्ये १२ लाख ९२ हजार २२१ हेक्टर क्षेत्रफलमा रोपाई सम्पन्न भएको छ ।
यो वर्ष अहिलेसम्म सबैभन्दा बढी सुदूरपश्चिम प्रदेशमा ९९.६ प्रतिशत रोपाई सम्पन् भएको छ । उक्त प्रदेशमा १ लाख ७३ हजार ७ सय ९९ हेक्टरमा रोपाइँ भएको हो ।
यस्तै अहिलेसम्म सबभन्दा कम रोपाईं कोशी प्रदेशमा भएको छ । कोशी प्रदेशमा ९०.७ प्रतिशत रोपाईं सम्पन्न भएको तथ्यांकले देखाउँछ । यो प्रदेशको २ लाख ७६ हजार ३८६ हेक्टर क्षेत्रफलमध्ये २ लाख ५० हजार ६२४ हेक्टर जमिनमा रोपाईं भएको छ । गत वर्ष भने यतिबेलासम्म कोशी प्रदेशमा ८३.६ प्रतिशत मात्रै रोपाईं भएको थियो ।
यस्तै मधेस प्रदेशमा ९२, बागमती प्रदेशमा ९०.८ प्रतिशत, गण्डकी प्रदेशमा ९१.९ प्रतिशत,लुम्बिनी प्रदेशमा ९१.३ प्रतिशत र कर्णाली प्रदेशमा ९६.९ प्रतिशत जमिनमा रोपाईं सकिएको छ । मनशुनको आगमन समयमै भएकाले यसपाली देशको सबै प्रदेशमा र उच्च दरमा रोपाईं सकिएको छ ।
.gif)
