काठमाडौँ / गैर आवासीय नेपाली संघ (एनआरएनए) का पूर्व अध्यक्ष तथा उच्चस्तरीय समितिका संयोजक डा शेष घलेले संसारभरि रहेका गैर आवासीय नेपालीहरूलाई आउँदो मे महिनामा काठमाडौँमा भेला भएर संस्थालाई एकजुट बनाउन र नयाँ विधान पारित गर्न आग्रह गरेका छन् ।
.gif)
उच्चस्तरीय समितिद्वारा बिहीबार भर्चुअल माध्यमद्वारा आयोजित अन्तरक्रियालाई सम्बोधन गर्दै घलेले संघको इतिहासमा आगामी अधिवेशन एक कोशे ढुंगा हुने बताए ।
“यो एनआरएनएको जग हाल्ने अवसर हो । हाम्रो संस्थालाई रूपान्तरण गर्ने अवसर हो । हामीले अधिवेशनबाट नयाँ विधान बनाउने छौँ । यो कमिटिको एकदमै बलियो म्यान्डेट छ । कसैलाई दोष दिनु भन्दा पनि ऐतिहासिक उपलब्धिको रूपमा लिएर कहिल्यै पनि विवाद नहुने गरी अगाडी बढ्ने अवसर हो” उनले भने ।
“हाम्रो संस्था अहिले सम्म (२२ वर्ष सम्म) टप डाउन रूपमा चलेको छ । समस्या सदस्यतामा छ । समस्या प्रतिनिधि छनोटमा छ । सर्वोच्चले समस्या पहिल्यायो। त्यसैले हामीले सबैलाई डेलिगेट्स बन्न खुला गर्यौँ । अब नयाँ विधानमा यो कुरा राख्नु पर्यो । बढीभन्दाबढी साथीहरू काठमाडौँमा आउनु भयो भने ठूलो सफलता हुने छ । तपाईंहरूको सहभागिता विना यो सम्भव छैन ।”
अध्यक्ष घलेले सर्वोच्च अदालतको परमादेशबाट गठित उच्चस्तरीय समितिले परराष्ट्र मन्त्रालयबाट पत्र पाएपछि अहिले सम्म १० ओटा बैठक गरिसकेको बताए ।
“अब (एकता महाधिवेशनका लागि) झन्डै २ महिना बाँकी छ । रात दिन काम गरौँ । हामीले कति दुःख गर्यौं आफ्नै भवन बनाउन, तर अहिले उक्त भवन अहिले भाडामा लगाएको छ । त्यो लिजमा दिने, मुनाफा गर्ने ठाउँ होइन । हामीलाई आफ्नै भवनमा बैठक गर्न नदिए पछि हामीले क्याफेमा, होटेलमा गएर पनि बैठक गर्यौँ । अब पछाडि सर्दैनौँ, अब कसैले पनि हामीलाई रोक्न सक्दैन,” उनले भने ।
आफ्नो स्वागत मन्तव्यमा उच्चस्तरीय समितिका सदस्य कुल आचार्यले आफुहरूले हिजो पनि एकता गर्नु पर्छ भनेर प्रयास गरेको र तत्कालिन प्रधानमन्त्रीको रोहबरमा पनि एकताका लागि प्रयास गरेको बताए ।
“हाम्रो एकता नहुँदा गैर आवासीय नेपाली नागरिकताको हालत कस्तो भएको छ ? सामाजिक सुरक्षा कोषमा हामीले गरेको सहकार्यका कारण विदेशमा निधन भएका नेपालीहरूको शव स्वदेश ल्याउने व्यवस्था भै रहेको छ । अब सर्वोच्चको फैसला र परराष्ट्रको निर्देशन अनुसार एकताको सूत्रमा जोडिन म आग्रह गर्छु,” उनले भने ।
उच्चस्तरीय समितिका सदस्य बिनोद कुँवरले कतिपय राष्ट्रिय समन्वय परिषद (एनसीसी) हरूले अप्रिल महिनाभित्रै अधिवेशन गर्न समस्या भै रहेको जनाएको बताए ।
“तपाईंहरूको केही समस्या छ भने हामीलाई जानकारी दिनोस् । राम्रोसंग टीओआर हेर्नोस् । हामीहरूसंग एमओयु गर्नोस्” कुँवरले भने ।
उनले परराष्ट्र मन्त्रालयले बनाएको क्राइटेरिया पुरा गर्ने जो कोही एनआरएनएको पंजीकृत सदस्य नेपाल आएर डेलिगेट्स बन्न सक्ने र मतदान गर्न सक्ने बताए । उनले एनसीसीको आफ्नो पोर्टलमा वा उच्चस्तरीय समितिको पोर्टल (धधध।लचलबजअि।अयm) मा गएर सदस्य बन्न पनि आग्रह गरे ।
