images
images

देशमा निराशा र बेरोजगारी दर्पण : कामको खोजीमा दसैँ नमनाइ विदेशिए ५६ हजार नेपाली

देशमा निराशा र बेरोजगारी दर्पण : कामको खोजीमा दसैँ नमनाइ विदेशिए ५६ हजार नेपाली

हरेक महिना १० हजार विद्यार्थीले छाड्छन् देश !

सोमवार, कार्तिक १३ २०८०
सोमवार, कार्तिक १३ २०८०
  • images
    images
    देशमा निराशा र बेरोजगारी दर्पण : कामको खोजीमा दसैँ नमनाइ विदेशिए ५६ हजार नेपाली

    काठमाडौँ / नेपालीहरूको महान चाडपर्वको समयमा पनि विदेशिने नेपालीहरूको संख्यामा भने कमि आएको छैन । पहिले–पहिले विदेश र सहरबजारबाट दसैँ र तिहार जस्ता चाडपर्व मनाउन जन्मथलो गाउँमा फर्कने चलन थियो । पछिल्लो केहि बर्ष यता यो परम्परा फेरिदै गएको छ । 

    images
    images

    विगतमा दसैँको समयमा काठमाडौँ उपत्यका खाली गरेर गाउँ आउनेहरूको ट्रेन्ड फेरिएर अहिले गाउँ–काठमाडौँ छाडेर रोजगारीको खोजीमा अर्थात श्रम बेच्न खाडी मुलुक तथा युरोप, अस्ट्रेलिया, जापान, क्यानाडा, अमेरिका लगायत विश्वका विकसित र राम्रा भनिएका मुलुकमा जाने प्रवृत्ति बढ्दै गइरहेको छ । 

    स्वदेशमा रोजगारीको अवसर नहुँदा नेपाली युवाहरू धमाधम विदेश जाने क्रम रोकिएको छैन । मुलुकमा बेरोजगारी बढ्दै गएपछि वैदेशिक रोजगार विभागका अनुसार चालु आर्थिक वर्ष २०८०/८१ सुरु भएयता अर्थात तिन महिनामा (साउनदेखि असोजसम्म) मात्रै एक लाख ६२ हजार ६९४ जना युवाहरू रोजगारीकै खोजीमा विदेश गएका छन् ।

    चालु आर्थिक बर्षको तिन महिनामा विदेशिनेहरूको तथ्याङ्क हेर्ने हो भने असोज महिनामा सबैभन्दा धेरै बाहिरिएका छन् । वैदेशिक रोजगार विभागको तथ्याङ्क अनुसार असोज महिनामा ५६ हजार २३५ जनाले श्रम स्वीकृति लिएर विदेशिएका हुन् । असोज महिनामा ३८ हजार ९४२ जनाले नयाँ श्रम स्वीकृति लिई विदेशिएका छन् भने १७ हजार २९३ जनाले पुनः श्रम स्वीकृति लिई विदेशिएका छन् । जसमध्ये ४९ हजार ३९८ जना पुरुष र ६ हजार ८३७ जना महिला कामको खोजीमा विदेशिएका छन् । यता गत आर्थिक बर्षको असोजमा वैदेशिक रोजगारीमा जाने नेपालीको संख्या ६२ हजार ७०६ थियो । 

    यता चालु आ.व.को साउन र भदौँ महिनामा पनि सोही हाराहारीमा बिदेसिएका थिए । साउन महिनामा ५५ हजार ५७५ जना र भदौँ महिनामा ५० हजार ८८४ जनाले श्रम स्वीकृति लिएर विदेशिएका छन् । यो नयाँ श्रम स्वीकृति तथा पुनः श्रम स्वीकृति लिनेसमेतको संख्या हो । यस्तै, गत आ.व.को साउन, भदौँ र असोजमा दुई लाख दुई हजार नेपाली विदेशिएका थिए । 

    वैदेशिक रोजगारको इतिहासमै गत आ.व.को भदौँ महिनामा सबैभन्दा बढि ७६ हजार ४०३ नेपालीले वैदेशिक रोजगारमा जान सरकारबाट श्रम स्वीकृती लिएका थिए । यो संख्या वैदेशिक रोजगार तथ्याङ्क राख्न सुरु गरेयता २९ बर्षकै उच्च थियो । तथ्याङ्क अनुसार वैदेशिक रोजगारीको ३० बषको इतिहासमा गत आ.व.मा सबैभन्दा धेरै युवा रोजगारी खोज्दै विदेश गएका थिए । चालु आ.व.मा भने यो संख्या ५५ हजारमा सिमित भएको छ । 

    झापाबाट मात्रै बाहिरिए २ हजार ६ सय युवा

    तथ्यांकअनुसार असोज महिनामा मात्रै जिल्लागतको क्रममा सबैभन्दा बढी दुई हजार ६ सय ७३ जना युवाहरू झापाबाट वैदेशिक रोजगारीका लागि बिदेसिएका छन् । त्यस्तै, धनुषाबाट दुई हजार ६ सय २९ जना नेपालीहरू वैदेशिक रोजगारीको लागि विभिन्न मुलुक गएको विभागका तथ्यांकले देखाएको छ । मोरङबाट दुई हजार तीन सय १८, सिराहाबाट दुई हजार एक सय १३, महोत्तरीबाट एक हजार आठ सय ६०, रूपन्देहीबाट एक हजार सात सय ८३ र सर्लाहीबाट एक हजार पाँच सय ५९, सप्तरीबाट एक हजार तीन सय ५५, चितवनबाट एक हजार तीन सय ५२ जना र कपिलवस्तुबाट एक हजार एक सय ९४ जनाले श्रम स्वीकृति लिई बिदेसिएका छन् । 

    कुन देशको लागि कतिले लिए श्रम स्वीकृति ? 

    वैदेशिक रोजगारीका लागि असोज महिनामा सबैभन्दा बढी संयुक्त अरब इमिरेट्स (युएई), साउदी अरेबिया, कतार र मलेसियाका लागि श्रम स्वीकृति लिएका छन् । असोजमा युएईका लागि १३ हजार ९ सय ५ जना र साउदी अरेबियाका लागि ११ हजार १ सय २३ जनाले श्रम स्वीकृति लिएका छन् । यस्तै, कतारका लागि १० हजार ६ सय १० जना र मलेसियाका लागि सात हजार ९ सय ९ जनाले श्रम स्वीकृति लिएको विभागको तथ्याङ्क छ । पछिल्लो समय वैदेशिक रोजगारीमा जाने नेपालीको संख्या मलेसिया भन्दा खाडी देशतिर बढ्न थालेको विभागको तथ्याङ्कले जनाएको छ ।  

    त्यसैगरी, कुवेतका लागि तीन हजार ७ सय ८१ जना नेपालीले श्रम स्वीकृति लिएका छन् । यस्तै माल्टाका लागि एक हजार एक सय ६० जनाले, जापानका लागि एक हजार ४८ जना, क्रोसियाका लागि ९ सय ७० जना, रोमानियाका लागि सात सय ४ जना, बहराइनका लागि ६ सय आठ जनाको स्वीकृति लिएका छन् । त्यस्तै साइप्रसका लागि ५ सय ३३ जनाले स्वीकृति लिएको विभागको तथ्यांक छ । असोजमा बिदेसिएका अधिकांश नेपाली युवा दक्ष योग्यताका छन् । विदेसिने क्रममा दक्ष योग्यताका ३८ हजार सात सय ३८ जना रहेका छन् भने अदक्ष योग्यताका १२ हजार पाँच सय २६ जना नेपाली युवा रहेका छन् ।  

    हरेक महिना १० हजार विद्यार्थीले छाड्छन् देश ! 

    नेपालमा उच्च शिक्षाको भविष्य राम्रो भए तापनि पढाइसँगै कमाइ गर्ने योजनाअनुसार अधिकांश विद्यार्थी माध्यमिक शिक्षा (कक्षा १२) उत्तीर्ण हुनासाथ विदेशिने गरेका छन् । उच्च शिक्षा अध्ययन गर्न हरेक महिना १० हजार विद्यार्थीले मुलुक छाड्छन् । यो संख्या भारतबाहेकको हो । शिक्षा मन्त्रालयलअन्तर्गत वैदेशिक अध्ययन अनुमति शाखाले उपलब्ध गराएको तथ्यांकअनुसार दैनिक करिब २ सय बढीले नो अब्जेक्सन लेटर (एनओसी) लिने गरेका छन् ।

    चालु आर्थिक वर्षको ३ महिनासम्ममा अर्थात साउनदेखि असोजसम्मको तथ्यांक अध्ययन गर्दा प्रत्येक महिना करिब १० हजारको संख्यामा विद्यार्थीले एनओसी लेटर लिने गरेका छन् । गत आर्थिक बर्षको असारमा ११ हजार २ सय १७ एनओसी लेटर लिएकोमा चालु आर्थिक बर्षको पहिलो महिना साउनमा १० हजार १ सय ८२ जनाले नो अब्जेक्सन लेटर लिएका छन् । यस्तै, भदौ र असोजमा मासिक करिब १० हजारले एनओसीलेटर लिएका छन् । तथ्यांकअनुसार वार्षिक करिब १ लाख १० हजार विद्यार्थीले एनओसी लेटर लिने गरेका छन् ।

    एनओसी लिएका अधिकांश विद्यार्थी उच्च शिक्षा अध्ययन गर्न अस्ट्रेलिया, अमेरिका, स्विजरल्यान्ड, बेलायत, जापान, जर्मन, साइप्रस, क्यानडा, चीनलगायत ९० भन्दा बढि मुलुकमा गएका हुन् । पछिल्लो समय नयाँ मुलुक रोमानियामा अध्ययन गर्न पनि एनओसी लेटर लिएका छन् ।

    ५ बर्षमा करिब साढे ३ लाखले लिए नो अब्जेक्सन सर्टिफिकेट
     
    ५ बर्षमा ३ लाख ४८ हजार ९ सय २० जनाले नो अब्जेक्सन सर्टिफिकेट अर्थात एनओसी लिएका छन् ।  विगतमा पढेलेखेकाहरू खाडी मुलुक र मलेसियामा गएर काम गर्ने गरेकामा अहिले १२ उत्तीर्ण हुने बित्तिकै नो अब्जेक्सन सर्टिफिकेट अर्थात एनओसी लिएर पीआर लिन र उत्तै बस्नका लागि विकसित मुलुक जानेको संख्या बढेको छ । 
     
    विगतमा खाडी र मलेसिया जानेले रेमिट्यान्स पठाउने गरेकाले चिन्ता नभएकोमा अहिले विकसित मुलुकमा जाने प्रवृत्ति बढ्न गई उत्तै बस्ने भएकाले नेपालबाट जनसंख्यासँगै पुँजी पनि नफर्किने गरी बाहिरिएको छ । जस कारण ‘ब्रेन ड्रेन’को खतरा पनि बढ्दै गइरहेको छ । ‘ब्रेन ड्रेन’एक प्रकारको बसाइसराइ हो, जसले आर्थिक रूपमा पिछडिएको देशका दक्ष मानिसहरू राम्रो अवसरको खोजीमा विकसित देशहरूमा सर्ने गर्दछ । यो पनि बसाइसराइ कै आर्थिक परिणाम हो।
     
    तथ्याङ्क अनुसार गत आर्थिक बर्षको अन्तयसम्ममा १ लाख १० हजार २ सय १७ जना विदेशमा अध्ययनका लागि अनुमति लिएका थिए । जसमा सबैभन्दा धेरै अष्ट्रेलियाका लागि ३३ हजार ९ सय ९१ जनाले नो अब्जेक्सन लेटर (एनओसी) लिएका थिए ।

    कुन आर्थिक बर्षमा कतिले लिए एनओसी ?
     
    आर्थिक बर्ष २०७५/०७६– ६३ हजार २५९
    आर्थिक बर्ष २०७६/०७७– ३३ हजार ३७  
    आर्थिक बर्ष २०७७/०७८– २७ हजार ९७८        
    आर्थिक बर्ष २०७८/०७९– १ लाख १४ हजार ४२९        
    आर्थिक बर्ष २०७९/०८०– १ लाख १० हजार २१७  

    तपाईको प्रतिक्रिया लेख्नुहोस
    images
    images
    images
    images
    images
    images
    images
    images
    images
    साताको लोकप्रीय
    थप समाचार