काठमाडौँ / एभरेष्ट बैंक लिमिटेडले चालु आर्थिक बर्ष २०८०/८१ को पहिलो त्रैमाससम्ममा ७८ करोड ७ लाख ५९ हजार रुपैयाँ खुद नाफा आर्जन गरेको छ । यो गत वर्षको सोही अवधिको तुलनामा ९.४५ प्रतिशतले कम हो । गत आर्थिक बर्ष तेस्रो त्रैमाससम्ममा एभरेष्ट बैंकले ८६ करोड २२ लाख रुपैयाँ नाफा कमाएको थियो ।
असोज मसान्तसम्ममा बैंकको खुद ब्याज आम्दानी ०।३२ प्रतिशतले बढेर १ अर्ब ८९ करोड १५ लाख रुपैयाँ पुगेको छ । गत वर्ष सोही अवधिमा बैंकको यस्तो आम्दानी १ अर्ब ८८ करोड ५४ लाख रुपैयाँ रहेको थियो ।
यस्तै, बैंकको सञ्चालन नाफा ९.४५ प्रतिशतले घटेर १ अर्ब ११ करोड ५४ लाख रुपैयाँमा सीमित भएको छ । गत वर्ष सोही अवधिमा बैंकको यस्तो नाफा १ अर्ब २३ करोड १८ लाख रुपैयाँ थियो । असोज मसान्तसम्ममा बैंकको खुद ब्याज आम्दानी बढे पनि सञ्चालन नाफा घटेकोले खुद नाफा बढ्न नसकेको हो ।
हाल बैंकको चुक्ता पुँजी १० अर्ब ६९ करोड ८० लाख ९४ हजार रुपैयाँ रहेको छ । यसको जगेडा कोषमा १० अर्ब ४६ करोड ८२ लाख रुपैयाँ कायम रहेको छ । यसको प्रतिसेयर आम्दानी २९ रुपैयाँ १९ पैसा छ ।
त्यसैगरी, प्रतिसेयर नेटवर्थ ४ रुपैयाँ ९८ पैसाले घटेर २४२ रुपैयाँ ३४ पैसा कायम भएको छ । यसको वितरणयोग्य नाफा ४ अर्ब ५२ करोड १० लाख रुपैयाँ रहेको छ । सो रकमबाट यसले ४२.२६ प्रतिशतसम्म लाभांश वितरण गर्न सक्ने क्षमता राख्छ ।
