भक्तपुर चेम्बर अफ कमर्सको संस्थाका अध्यक्ष न्हुछे रत्न मानन्धरले आर्थिक क्षेत्र निराश हुँदै गएकोतर्फ संकेत गरेका छन् । उनले  व्यवसायीहरुलाई जागरुक बनाउँदै उत्साह जगाउने अभियान थाल्नुपर्ने बताए । 

संस्थाले शुभ दिपावली (स्वन्ती नखः) २०८०, नेपाल सम्वत् (न्हू द“) ११४४ र छठ पर्वको अवसरमा शुभकामना आदान प्रदान कार्यक्रम गरेको थियो । सोही अवसरमा मौजूदा आर्थिक अवस्था र अबको बाटो विषयमा एक प्रस्तुतिकरण कार्यक्रमसमेत भएको थियो ।

कार्यक्रमका प्रमुख अतिथि अर्थविज्ञ एवं इन्जिनियर ज्ञानेन्द्रलाल प्रधानले राज्यको नेतृत्व तह स्वार्थ नभए विकासको सम्भावना धेरै भएको बताए ।

मुलुकमा अझै पनि सबल पक्ष धेरै रहेको उनको भनाइ थियो । राजनीतिक तहलाई दवाव दिनु पर्नेमा  उनको जोड रहेको छ । 

कार्यक्रममा भक्तपुर चेम्बर अफ कमर्सका उपाध्यक्ष कविदास श्रेष्ठले संस्थाले उद्यमी व्यवसायीको आवश्यकतामा आधारित रहेर सेवा सुविधा उपलब्ध गराउँदै आएको बताए । 

व्यवसायिक विषय बस्तुमा विचार मन्थनका लागि भक्तपुर चेम्बर अफ कमर्स उपयुक्त स्थान भएको बताए । 
संस्थाका कार्यसमिति सदस्य माधव प्रसाद प्रजापतिको संयोजकत्वमा भएको उक्त कार्यक्रममा जिल्लाका विभिन्न क्षेत्रका उद्यमी व्यवसायी, लब्ध प्रतिष्ठित व्यक्तिहरु लगायत विभिन्न वस्तुगत एवं व्यवसायिक संघसंस्थाका प्रतिनिधिहरुको सहभागिता रहेको थियो ।