काठमाडौँ / नेपाली र भारतबिच तीन महिनाका लागि विद्युत आयात गर्न दिने सम्झौता नवीकरण भएको छ  । ऊर्जा, जलस्रोत तथा सिञ्चाई मन्त्रालयका अनुसार भारतीय पक्षले थप ३ महिनाका लागि बिजुली आयात गर्ने गरी सम्झौता नवीकरण गरेको हो । 

नेपालले १ वर्षका लागि बिजुली आयात गर्ने प्रस्ताव नवीकरण गर्न पठाए पनि भारतले भने ३ महिनाका लागि मात्रै अर्थात २०८१ असार दोस्रो सातासम्मका लागि मात्रै नवीकरण गरेको हो । सम्झौता नवीकरण भएसँगै अब नेपालमा डेढ महिनाका लागि हुनसक्ने सम्भावित ‘लोडसेडिङ’को जोखिम टरेको छ । 

सम्झौता अनुसार भारतको एक्सचेन्ज मार्केटबाट आगामी तीन महिनासम्म ५ सय ५४ मेगावाट विद्युत् आयात गर्न पाइने नेपाल विद्युत् प्राधिकरणका प्रवक्ता चन्दनकुमार घोषले जानकारी दिए । उनका अनुसार त्यसमध्ये ५ सय मेगावाट ढल्केबर–मुजफ्फरपुर प्रसारण लाइन र ५४ मेगावाट टनकपुरबाट आयात गरिने जानकारी उनले दिए । 

अहिले नेपालले भारतबाट ६ सय ५० मेगावाट विद्युत् आयात गर्न पाउने व्यवस्था छ । एक वर्षका लागि हुनुपर्ने सम्झौता तीन महिनाका लागि मात्र नवीकरण गरेको भारतले विद्युत् परिमाण पनि घटाएको छ । असारपछि नेपालसँग पर्याप्त विद्युत् हुने र निर्यात समेत सुरु हुने भएकाले यो सिजन्मा आपूर्ति समस्या नहुने प्रवक्ता घोषले बताए । 

भारतबाट ५५४ मेगावाट विद्युत् आयात गर्दा पनि नेपालको माग धान्न सकिने उनको भनाइ छ ।