काठमाडौँ / सीजी फुड्समा शुक्रबार भएको आक्रमणको घटनाप्रति नेपाल उद्योग परिसंघले गम्भिर ध्यानाकर्षण भएको जनाएको छ । आइतबार एक विज्ञप्ति प्रकाशित गरी परिसंघले देशकै प्रमुख औद्योगिक घराना चौधरी ग्रुपबाट सञ्चालित उद्योगमाथि भएको घटनामा संलग्न जो कोहीलाई कानुनी दायरामा ल्याउन माग गरेको छ ।

“सीजी फुड्समा कार्यरत कर्मचारीमाथि हातपात एवं भौतिक सम्पत्ति तोडफोड गरिएको घटना निन्दनिय छ,” विज्ञप्तिमा उल्लेख छ । 

हालको विषम परिस्थितीमा निरुत्साहित बनिरहेको निजी क्षेत्रको मनस्थितीलाई यस्ता घटनाले थप हतोत्साही बनाउने, लगानीको वातावरण बिग्रने र समृद्ध अर्थतन्त्रको प्रयासमा गम्भिर असर पार्ने परिसंघको भनाइ छ । 

विज्ञप्तिमा भनिएको छ, “यस्ता कार्यलाई निरुत्साहित गर्न कडा रूपमा प्रस्तुत हुन सरकार, प्रशासन एवं सम्वन्धित सरोकारवालाहरूको गम्भिर ध्यानाकर्षण गराउन चाहन्छौँ ।”