काठमाडौँ / सिभिल सहकारीबाट पीडित बचतकर्ताहरूले ऋण लिएका व्यक्ति र संस्थाहरूबाट उठाएर आफूहरूको बचत फिर्ता गरिनुपर्ने बताएका छन् । आज (शनिबार) राजधानीमा आयोजित पत्रकार सम्मेलन गर्दै उनीहरूले यस्तो बताएका हुन् ।
सिभिल सहकारीका अध्यक्ष केशवलाल श्रेष्ठ र पूर्वअध्यक्ष इच्छाराज तामाङ अहिले थुनामा छन् । थुनामा रहेका तामाङ सिभिल सहकारीका ऋणीसमेत हुन् ।
बचतकर्ताहरूका अनुसार सुनधारास्थित सिभिल मलमा सिभिल सहकारीको ५० प्रतिशत शेयर छ । उक्त मलको बाँकी ५० प्रतिशत शेयर लालकाजी गुरूङ र उनकी श्रीमती मिनाको नाम छ । आधा लगानी सहकारीको भएपनि अहिलेसम्म मलको आम्दानी सहकारीलाई नदिइएका उनीहरूले बताए । सहकारीलाई मलको आम्दानी दिने हो भने साना बचतकर्ताको रकम फिर्ता गर्न समस्या नहुने बचतकर्ताहरूको भनाइ छ ।
कम्पनी रजिष्टार कार्यालयको डकुमेन्टमा उक्त मलको १७ लाख कित्ता शेयर सिभिल सहकारीको नाममा र १७ लाख कित्ता लालकाजी र मिनाको नाममा रहेको उनीहरूले बताए । अहिलेसम्म सिभिल मलले आम्दानी सहकारीलाई दिएको छैन । बचतकर्ताहरूका अनुसार मल बनाउँदा उल्टै मिनाले शेयर धितो राखेर ऋण लिएकी थिईन् ।
उनले लिएको ऋणको साँवा, व्याज २०७८ सालमै ५६ करोड पुगिसकेको थिए । लालकाजीले मिनाको नाममा लिएको ऋण पनि नतिरेको र अहिले आएर मलमा सहकारीको शेयर नरहेको भनी मुद्दा दायर गरेको उनीहरूले बताए ।
‘लालकाजी र मिनाले अहिले सिभिल मलमा सिभिल सहकारीको शेयर छैन । ऋण पनि लिएको छैन भनेर मुद्दा हालेका छन् । कम्पनी रजिस्टारको कार्यालयको डकुमेन्टमा भने १७ लाख सिभिल सहकारी र १७ लाख कित्ता लालकाजी र मिनाको नाममा छ । उनले कुनै कारणले मुद्दा जितेको खण्डमा हाम्रो बचत झनै जोखिममा पर्नेभयो,’– एक बचतकर्ताले भने ।
सिभिल सहकारीले सिभिल मलमा गरेको लगानी र मिनाले लिएको ऋण उठाउँदा मात्रै पनि अहिले ५ अर्ब रूपैयाँ सहकारीमा आउने उनीहरूको आँकलन छ । उनीहरूले सो पैसा फिर्ता गराउन सकेको खण्डमा धेरै पीडितले न्याय पाउने बताए ।
पीडित बचतकर्ताहरूले सिभिल मलमा सहकारीले गरेको लगानी फिर्ता गराउनुपर्ने, मलकी शेयर धनी मिनाले लिएको ऋणी तिराउनुपर्ने र मलको आम्दानी पनि सहकारीलाई दिनुपर्ने माग राखेका छन् । पीडित बचतकर्ताका अनुसार अहिले मलबाट महिनाको दुई करोडभन्दा बढी भाडा उठ्छ ।
