काठमाडौँ / नेपाल स्टक एक्सचेन्ज (नेप्से)का प्रमुख कार्यकारी अधिकृत (सिइओ)मा चूडामणि चापागाईंले जिम्मेवारी सम्हालेका छन् । सोमबारको मन्त्रीपरिषद् बैठकले चापागाईंलाई नेप्सेको सिइओमा नियुक्त गरेको हो ।

नेप्सेका नवनियुक्त प्रमुख कार्यकारी अधिकृत चापागाईंले राजस्व सचिव दिनेशकुमार घिमिरेसँग मङ्गलबार नियुक्तिपत्र बुझेका हुन् । नियुक्तिपत्र बुझेसँगै चापागाईं नेप्सेमा पुगेर पदभार ग्रहण गरेका हुन्। गत माघ २५ गतेबाट कृष्णबहादुर कार्कीको कार्यकाल सकिएपछि नेप्से नेतृत्वविहिन थियो । 

झापाका चापागाइँसँग बैंकिङ र बीमा क्षेत्रमा काम गरेको अनुभव रहेको छ। लामो समय सानिमा बैङ्कमा आबद्ध रहेर काम गरेका चापागाईं हाल सानिमा रिलायन्स लाइफ इन्स्योरेन्सका डेपुटी जनरल म्यानेजर रहेका थिए । 

त्यसअघि उनी पाथीभरा विकास बैङ्क, सनराइज बैङ्क, युनियन लाइफ र सानिमा लाइफ हुँदै सानिमा रिलायन्स लाइफमा आबद्ध भएका थिए । यसअघि नियुक्त नेप्से सिइओ नारदकुमार लुइटेल विवादमा तानिएपछि सरकारले नयाँ प्रमुख कार्यकारी नियुक्त गरेको हो ।

यसअघिको मन्त्रीपरिषद्को बैठकमा अर्का प्रतिस्पर्धी नारदकुमार लुइटेललाई बनाउने निर्णय भए पनि ‘माइन्युट’ हुनुअघि प्राप्त सूचनाका आधारमा सरकारले निर्णय उल्ट्याएको हो ।

सिइओ छनोटका लागि अन्तिम पाँच जना उम्मेदवारको सूचीमा चूडामणि चापागाईं, नारदकुमार लुइटेल, पूर्णप्रसाद आचार्य, बद्रीप्रसाद प्याकुरेल र हेमन्त बस्यालको नाम परेको थियो । तत्कालीन सिइओ कृष्णबहादुर कार्कीको पदावधि सकिएपछि गत माघ २५ देखि नेप्से सिइओविहीन रहेको थियो ।