काठमाडौँ / जिल्ला अदालत सर्लाहीले रामबहादुर बम्जनलाई १० वर्ष कैद तथा ५ लाख रुपैयाँ क्षतिपूर्ति भराउने फैसला सुनाएको छ। ।

आफूलाई तपश्वी दाबी गर्दै विभिन्न आश्रममा बस्ने बमजनले बाल यौन दुरूपयोग गरेको भन्दै अदालतले १० वर्ष कैद सुनाएको हो । 

जिल्ला अदालत सर्लाहीका न्यायाधीश जीवन कुमार भण्डारीको इजलासले सोमबार अभियुक्त बम्जनविरुद्ध त्यस्तो फैसला गरेको अदालतका स्रेस्तेदार सदन अधिकारीले जानकारी दिए ।

यसअघि दोषी ठहर भएका बमजनको हकमा सोमबार सजाय निर्धारण बहस भएको थियो । बहसमा सरकारले जन्मकैद २० वर्ष सजाय हुनुपर्ने माग गरेका थिए । 

तर अदालतले आधामात्र १० वर्ष कैदको फैसला सुनाएको हो । अब उक्त फैसलाविरुद्ध सरकार र बमजन दुवैलाई उच्च अदालत जाने बाटो बाँकी नै छ ।

को हुन् बम्जन ?

बमजन आबद्ध धार्मिक संस्थाको वेबसाइट मैत्रीय डट इन्फोमा उपलब्ध जानकारी अनुसार उनको जन्म सन् १९९०को एप्रिल १० तारिखमा रतनपुर बारामा भएको थियो। उनका मातापिता किसान थिए। उनकी आमाको १२ वर्षको उमेरमा विवाह भएको थियो। उनका ५ छोरा र ४ छोरी छन्। रामबहादुर तेस्रो छोरा हुन्।

"उनी गर्भमा हुँदा उनकी आमालाई माछा मासु खान मन लागेको थिएन र पछि बमजनले पनि मासु खाएनन्। उनी सानो उमेरदेखि नै लामो समयसम्म घर बाहिर जाने गर्दथे।"

उनले कलिलो उमेरमै ध्यानमा मग्न भएर सबैलाई आश्चर्यचकित बनाएको बताइन्छ। उनका परिवार, साथीभाइ र अनुयायीले बमजन ६ महिनासम्म पानी समेत नपिएर ध्यानमा लीन भइसकेको र बुद्धत्व प्राप्त नहुँदा सम्म उनी ध्यानमै रहने बताएका थिए।

उक्त विवरणका अनुसार गौतम बुद्धको आमाको नाम मायादेवीसँग मिल्न गएको बमजनको आमाको नामका कारण पनि स्थानीयहरूले उनले गरेको तपस्यालाई सिद्धार्थ गौतम बुद्धसँग जोडेर हेरेका थिए।

त्यसो त तपस्या सुरु गर्नु अघि नै उनले आफ्नो परिवारका अन्य सदस्यलाई पशुबली नदिन, माछा मासु र रक्सी सेवन नगर्न आग्रह गर्ने गरेको पारिवारिक श्रोतहरूले बताउने गरेका छन्।

तपस्या गर्ने क्रममा उनी बीचबीचमा हराउने र केही समयपछि फेला पर्ने क्रम चलिनै रह्यो। १६ वर्षको उमेरमा तपस्या गर्न सुरु गरेका बमजन पहिलो पटक १० महिना लामो ध्यान बसेकै बेला अचानक गायब भएका थिए।

तपस्याप्रति उनको लगाव र बुद्धसँगको तुलनाका कारण उनी ध्यान बसेको स्थान आसपास उनलाई हेर्न मात्र आउने आगन्तुक र भक्तजनहरूको भिड लाग्ने गरेको जानकारहरू बताउँछन्।

अनुयायीहरूले बिस्तारै उक्त क्षेत्रलाई लुङ्ता छोर्तेन जस्ता धार्मिक ध्वजा-पताकाले सुसज्जित गरेपछि उक्त स्थान बिस्तारै धार्मिक स्थलमा परिणत हुँदै गयो।

नेपालमा मात्र नभएर विश्वव्यापी रूपमै चर्चा बटुल्न सफल उनको कर्मले यति चर्चा पायो कि उनले निकै कम समयमा सामान्य बुद्धभक्तबाट चर्चित तपस्वीको भेष धारण गरे।

देशका विभिन्न ठाउँहरूमा आश्रम खोले र नेपालभित्र र बाहिर आफ्ना अनुयायीहरूको सङ्ख्या समेत क्रमिकरूपमा बढाउँदै लगे। त्यसै कारण उनले "भित्रभित्रै असीमित शक्ति" आर्जन गर्न थालेको उनीबारे प्रकाशित थुप्रै विवरणहरूमा उल्लेख छ।

विवादहरू

बम्जनका अनुयायीहरूका अनुसार उनी महिनौँसम्म नखाएर वा नसुतेर ध्यान गर्ने सक्ने गरेको दावी गरेका छन्। वि.सं २०६६ सालमा बम्जनमाथि १७ जना गाउँलेको समूहमाथि आक्रमण गरेको आरोपमा अनुसन्धान गरिएको थियो। 

बम्जनले आफूले जानीजानी आफ्नो ध्यानमा बाधा पुर्‍याएको दावी गरेका थिए तर गाउँलेले उनीहरू त्यहाँ तरकारी खोज्नका लागि गएको बताएका थिए। बम्जनले उनीहरू हातपात गर्ने प्रयास गरेपछि मात्र उनीहरूविरुद्ध हातपातमा उत्रिएका थिए भने गाउँलेले माफी माग्नेबित्तिकै उनले हातपात रोकेको दावी गरेका थिए। 

यद्यपि पीडितहरूको अनुसार तीन घण्टासम्म उनले उनीहरूको टाउको र ढाडमा बन्चरोको बिँडले हिर्काउँदा एक पीडित गम्भीर घाइते भएका थिए। बम्जनले कुनै पनि सम्भावित परीक्षणमा उपस्थित हुन अस्वीकार गर्दै भनेका छन्, ‘के तपाईहरूलाई लाग्छ, ध्यान गर्ने ऋषि मुद्दाको सुनुवाइ गर्न अदालतमा जान्छन् ? मैले तिनीहरूलाई ईश्वरीय व्यवस्थाअनुसार कारबाही गरेँ ।’ 

वि.संं २०६८ सालमा नेपाल प्रहरीले बम्जनका अनुयायीहरूबाट स्लोभाकियाकी एक महिलालाई उद्धार गरेको घोषणा गरेको थियो तर अन्य प्रतिवेदनहरूमा अपहरणको सञ्चार माध्यमद्वारा प्रचार पछि उनलाई स्वेच्छाले रिहा गरिएको दावी गरिएको थियो।

न्युजविकका अनुसार उनलाई बम्जनका दुई जना मानिसले होटलबाट मोटरसाइकलमा चढाएर तीन महिनासम्म रूखमा बाँधेर राखेको र तपस्वीको ध्यानबिथोल्न बोक्सीको अभ्यास गरेको आरोप लगाएका थिए तर अर्को एक प्रतिवेदनमा उनलाई गुम्बाबाट अपहरण गरिएको दावी गरिएको छ। 

रिहा हुँदा उनको हात भाँचिएको थियो। उनी रिहा भएको एक हप्तापछि बम्जनका भाइबहिनीले बम्जनले आफ्ना भाइहरूलाई रातभर बन्धक बनाएको र आफ्ना भाइ र बहिनीलाई कुटपिट गरेको आरोप लगाएका थिए। बम्जनका अनुयायीहरूले बम्जनको एउटा प्रवचन रेकर्ड गरेपछि पाँच जना पत्रकारमाथि आक्रमण गर्नुका साथै उनीहरूको क्यामरा पनि नष्ट गरिदिएका थिए।

वि.सं २०७५ सालमा बम्जनमाथि १८ वर्षीया भिक्षुणीलाई दुई वर्षसम्म पटकपटक बलात्कार गरेको आरोप लागेको थियो। महिला अधिकार समूहहरूले आयोजना गरेको पत्रकार सम्मेलनमा भिक्षुणीले आफ्नी श्रीमतीले आफ्नो धर्ममाथि आक्रमण आकर्षित नहोस् भनेर दुर्व्यवहार लुकाउन खोजेको आरोप पनि लगाएकी थिइन्।

बम्जनका समर्थकहरूले भिक्षुणी वास्तवमा चोरीमा संलग्न भएको र उनलाई गुम्बाबाट निकालिएको दावी गरेका थिए। वि।सं २०७६ सालमा परिवारका सदस्यले बम्जनका विभिन्न आश्रमबाट चार जना भक्तजन हराएको गुनासो गरेपछि अनुसन्धान सुरु गरिएको थियो। सोही महिना प्रहरीले बम्जनको एउटा आश्रममा छापा मार्दा पनि उनी फेला परेका थिएनन्।

वि.सं २०७६ माघ २३ का दिन सर्लाही जिल्ला अदालतले बम्जनविरुद्ध पक्राउ पुर्जी जारी गरेको थियो। अर्को दिन प्रहरीले उनको अर्को आश्रममा छापा मारेतापनि उनलाई फेला पार्न सकेनन्। प्रहरीले उनका एक चेला ज्ञानबहादुर बम्जनलाई पक्राउ गरेको थियो।