काठमाडौँ / राष्ट्र बैंकले बुधबार ४० अर्ब रुपैयाँ तरलता खिच्ने भएको छ । बजारमा अधिक तरलता थुप्रिएसँगै केन्द्रीय बैंकले २१ दिनका लागि निक्षेप सङ्कलन उपकरणको माध्यमबाट तरलता प्रशोचन गर्ने भएको हो ।
२०८१ साउन ९ गते मध्यान्ह ३ बजे अनलाइन विडिङमार्फत निक्षेप सङ्कलनको बोलकबोल गर्ने जनाएको राष्ट्र बैंकले जनाएको छ । उक्त निक्षेपपत्र आजै बिक्री गरिनेछ जसका लागि इच्छुक बैंक तथा वित्तीय संस्थाहरूले ३ बजेभित्र आवेदन दिइसक्नुपर्नेछ ।
निक्षेप सङ्कलन बोलकबोलमा भाग दिन चाहने बैंक तथा वित्तीय संस्थाहरूले घटीमा १० करोडदेखि बढीमा ५ करोड रुपैयाँले भाग गर्दा निःशेष भाग जाने अंकसम्मका लागि आवेदन दिन सक्नेछन् ।
कर्जा लगानी बढ्न नसक्दा केन्द्रीय बैंकले नियमित रूपमा निक्षेप सङ्कलन उपकरणमार्फत तरलता खिचिरहेको छ । साउन २ गतेसम्म ७७.८७ प्रतिशत सीडी रेसियो (कर्जा निक्षेप अनुपात) कायम गरेका बैंकहरूसँग ६ खर्ब रुपैयाँबढी तरलता रहेको छ ।
यो बैंक तथा वित्तीय सस्थामा धितोका रूपमा समेत प्रयोग गर्न सकिने राष्ट्र बैंकले जनाएको छ । हाल बैंक तथा वित्तीय संस्थामा ६४ खर्ब ६४ अर्ब रुपैयाँभन्दा बढी निक्षेप सङ्कलन हुँदा कर्जा लगानी भने ५१ खर्ब ४४ अर्बबढीले मात्रै हुन सकेको पछिल्लो तथ्याङ्क छ ।
