काठमाडौँ / एभरेष्ट महिला भलिबल लिगमा डेब्यु गर्नु अघि काठमाडौँ स्पाइकर्सले जगदीश भट्टलाई टिमको मुख्य प्रशिक्षकमा नियुक्त गरेको छ। काठमाडौँले बिहिबार भट्टलाई मुख्य प्रशिक्षकमा नियुक्त गरेको हो।
लामो कोचिङ अनुभवसँगै भलिबलको राष्ट्रिय र अन्तर्राष्ट्रिय स्तरमा विभिन्न प्रकारको नेतृत्व गरिसकेका भट्ट आगामी सिजनमा स्पाइकर्सलाई सफलता दिलाउन तयार देखिएका छन्।
बलियो रणनीतिक कौशल र बलिया टिमहरू बनाउने क्षमताका लागि परिचित जगदीश भट्ट भलिबलका एक सम्मानित प्रशिक्षक हुन्।
एशिया र युरोपका उच्चस्तरीय टिमहरूलाई प्रशिक्षण दिने अनुभव संगालिसकेका भट्ट आफ्नो प्राविधिक विशेषज्ञता र प्रेरक दृष्टिकोणको लागि परिचित छन्।
भट्टसँग खेलाडीहरूलाई उनीहरूको पूर्ण क्षमतामा खेल्न सक्ने बनाउने र जुनसुकै प्रतिस्पर्धाका लागि सक्षम टोलीहरू निर्माण गर्ने रेकर्ड रहेको छ।
काठमाडौँ स्पाइकर्सकी सीओओ सुदिक्षा अधिकारीले प्रशिक्षक भट्टको आगमनले टिमलाई उत्कृष्ट र प्रतिस्पर्धात्मक बनाउन सहयोग पुग्ने विश्वास व्यक्त गरिन्।
उनले भनिन्, ‘प्रशिक्षक भट्टको आगमनले प्राविधिक रूपमा उत्कृष्ट र प्रतिस्पर्धात्मक टोली निर्माण गर्ने हाम्रो प्रतिबद्धतालाई सहयोग हुनेछ। उहाँसँग रहेको खेलप्रतिको गहिरो बुझाइ र खेलाडीलाई निखार्नका लागि चाहिने जोशले हाम्रो टोलीको प्रदर्शनलाई पक्कै पनि उच्च पार्नेछ। उहाँको मार्गदर्शनले हाम्रा स्थानीय र अन्तर्राष्ट्रिय खेलाडीहरूबीचको सन्तुलन हेर्न पनि हामी उत्सुक छौं।’
प्रशिक्षक जगदिश भट्टले आफ्नो नयाँ भूमिकाप्रति उत्साह व्यक्त गरे। उनले लिगमा आफ्नो टिमले राम्रो प्रभाव देखाउने बताए।
‘काठमाडौँ स्पाइकर्सको यो नयाँ जिम्मेवारी निभाउन पाउँदा म उत्साहित छु। यो टिम सम्भावनाले भरिएको छ र म एकजुट भएको प्रतिस्पर्धात्मक युनिट बनाउन खेलाडी र स्टाफहरू दुवैसँग मिलेर काम गर्न तत्पर छु। एभरेष्ट महिला भलिबल लिग एउटा रोमाञ्चक मञ्च हो र यसमा आफ्नो प्रभाव देखाउन म स्पाइकर्सलाई मद्दत गर्न तयार छु।’ उनले भने।
जगदिश भट्ट मुख्य प्रशिक्षक बनेसँगै काठमाडौँ स्पाइकर्स एभरेष्ट महिला भलिबल लिगको पहिलो सिजनका लागि उत्साहित छ।
