काठमाडौँ / पाटन हेरिटेज जेम्स एण्ड ज्वेलरी एक्सपो, २०२४ सम्पन्न भएको छ । पाटन दरबार परिसरमा आयोजित भव्य समारोहबीच आयोजित समारोह हिजो (सोमबार) सम्पन्न भएको हो ।

ललितपुर रत्न तथा आभुषण संघ र रोटरी क्लब अफ पाटन हेरिटेजको संयुक्त आयोजनामा भएको एक्सपोमा अवलोकनकर्ताहरूको उत्साहजनक सहभागिता रहेको आयोजकले जनाएको छ । 

एक्सपोमा साँस्कृतिक, व्यापारिक, स्थानीय परिकार तथा पर्यटन प्रवद्र्धनात्मक गरी २५ वटा स्टलहरू थिए । 

उक्त स्टलहरूको माध्यमबाट स्थानीय उद्योग व्यवसाय लगायत नेपालमा पाइने खनिजसहित कला, संस्कृति, स्थानीय गरगहना तथा कलाकृतिहरू प्रदर्शन गरिएको क्लबका अध्यक्ष सज्जु व्यञ्जनकारले जानकारी दिए । 

‘समृद्धिका लागि सम्पदा संरक्षण’भन्ने मूल नाराका साथ आयोजित सो कार्यक्रमबाट धार्मिक, आध्यात्मिक, साँस्कृतिक तथा पुरातात्विक महत्त्व बोकेको ललितपुरको पाटन दरबार क्षेत्रको प्रचार प्रसार हुने अपेक्षा गरिएको छ । 

साथै,उक्त क्षेत्रको विशिष्ट पहिचान बोकेका गरगहना तथा प्राचिन पहिरनहरूको पुनरावृत भई आर्थिक गतिविधि समेत बढ्ने विश्वास रहेको आयोजकले जनाएको छ । 

विश्व पर्यटन दिवसको अवसरमा आयोजित एक्सपोको गत शुक्रबार उद्योग, वाणिज्य तथा आपूर्तिमन्त्री दामोदर भण्डारीले उद्घाटन गरेका थिए । 

उक्त एक्सपोको समापन समारोहमा -याम्प वाल्कको प्रस्तुति रहेको थियो भने कार्यक्रममा परम्परागत चर्या तथा अन्य नृत्य समेत प्रस्तुत गरिएको थियो ।

रोटरी क्लब अफ काठमाडौँ हेरिटेज, रोट्रयाक्ट क्लब अफ पाटन हेरिटेज, रोटरी क्लब अफ ललितपुर, रोटरी क्लब अफ यल पाटन र रोटरी क्लब अफ भरतपुरको सहयोगमा सो कार्यक्रम सम्पन्न भएको आयोजकले जनाएको छ ।