काठमाडौँ / कवाड व्यवसायीहरूले पुस १४ गते काठमाडौँ महानगरपालिका घेर्ने घोषणा गरेका छन् । महानगरपालिकाका मेयर बालेनलाई रावणको संज्ञा दिँदै अब रावण बस्ने लंका दहन गरिने चेतावनी कवाड संघर्ष समितिले दिएको छ ।
काठमाडौँ महानगरपालिकाको मेयर बालेन शाहले रावण बनेर हामीलाई व्यवहार गरे । अब हामी राम बनेर हमला गर्ने छौँ, लङ्का दहन गर्नेछौं,”– संघर्ष समितिका संयोजक राम केवल गुप्ताले भने ।
महानगरपालिकाले व्यवसायबाट विस्तापित गराउन खोजेको दुःख दिएको कवाड व्यवसायीको आरोप छ । गुप्ताले अब आफूहरू काठमाडौँ महानगरविरूद्ध लड्न, भिड्न तयार भएर आन्दोलनमा जान लागेको बताए ।
उनले काठमाडौँका मेयर बालेन शाहलाई रावणको संज्ञा दिए । साथै, काठमाडौं महानगर प्रहरीहरूले कवाड व्यवासायीलाई दुःख दिएको, हातपात गरेको, कुटपिट गरेको र गाली बेइनजती गरेको उनले बताए ।
कवाड व्यवासायीहरूले अब महानगर प्रमुख बालेन र नगरप्रहरी प्रमुख राजुनाथ पाण्डेविरूद्ध प्रहरीमा उजुरी दिने पनि जानकारी दिएका छन् ।
अदालतले कवाड नहटाउन आदेश दिए पनि महानगरले त्यसको विपरीत काम गरिरहेको उनले बताए । काठमाडौँ महानगरपालिका प्रमुख शाह धेरै सन्किएको र बहुलाइसकेको टिप्पणी गर्दै उनले अब जेल कोच्नुपर्ने बताए । बालेन देश र महानगरको लागि खतराको रूपमा देखिएको उनको टिप्पणी छ ।
