काठमाडौँ / भाटभटेनी सुपरमार्केटका अध्यक्ष मीन बहादुर गुरुङले गत शुक्रबार भएको राजावादीहरूको आन्दोलन र प्रदर्शनमाथि प्रश्न उठाएका छन् ।

सुरक्षा गार्ड तथा कर्मचारी सम्मान समारोहमा बोल्दै उनले राजावादीहरूको प्रदर्शनका कमाण्डर दुर्गा प्रसाईँको शैली र उक्त आन्दोलनमाथि प्रश्न उठाएका हुन् । भाटभटेनी लुट्नेले भोलिका दिनमा अन्य व्यवसाय पनि लुट्न सक्नै बताउँदै उनले प्रश्न गरे, “यस्ता लुटेराले ल्याउने परिर्वतन हामीलाई चाहिएको हो ?”

उक्त घटना ज्यादै निन्दनीय भएको उनले बताएका छन् । “आन्दोलनका कमाण्डर दुर्गा प्रसाईँको बी एन्ड सी मेडिकल कलेजमा पनि भाटभटेनीमा जस्तै गरी लुटापाट र ढुङ्गा गर्यो भने के हुन्छ ?, आन्दोनको मूख्य नाइके पूर्वराजा ज्ञानेन्द्र शाहको दरबारमा गर्यो भने के हुन्छ ?” अध्यक्ष गुरुङ्ले प्रश्न गरे ।  आफू एक नागरिक भएको र राज्यले गुण्डा र डनहरूलाई जेसुकै गर्न पनि छुट दिएको अध्यक्ष गुरुङको गुनासो छ । उद्यमी व्यवसायीका लागि सहज वातावरण नभएको र राज्यले गुण्डा र डनहरूलाई छुट दिएकै कारण मुलुकको वर्तमान अवस्था सिर्जना भएको उनले बताए । 

भाटभटेनीले शुक्रबार कोटेश्वरस्थित भाटभटेनीमा राजावादी प्रदर्शनकारीहरूले लुटपाटको प्रतिकार गर्ने सुरक्षा गार्ड कृष्णप्रसाद पराजुलीलाई ५ लाख १ हजार १११ रुपैयाँ पुरस्कारसहित सम्मान गरेको छ । अध्यक्ष गुरुङले नगद पुरस्कारसहित उनलाई सम्मानित गरेका हुन् ।

उक्त कार्यक्रमका भाटभटेनीले अन्य कर्मचारी तथा सुरक्षा गार्डहरूलाई पनि सम्मान गरेको छ । भाटभटेनीले एक जनालाई ५१ हजार रुपैयाँ र शुक्रबार ड्युटीमा खटिएका अर्का थप दुई जनालाई जनही २५ हजार रुपैयाँ नगदसहित सम्मान गरेको छ । 

भाटभटेनीका सिइओ राजु पौडेलले सो अवसरमा तोडफोड तथा लुटपाट भइरहेको समयमा आफ्नो कर्तव्य पूरा गर्दै  अग्रपंंक्तिमा खटिएका कर्मचारी तथा व्यापारलाई निरन्तरता दिन रातभर मर्मत सम्भारमा लाग्न खटिएका कर्मचारीको मनोबल उच्च बनाउन उक्त सम्मान गरिएको बताए । 

पुरस्कृत पराजुलीले लुटपाट गर्ने प्रदर्शनकारीहरूको प्रतिकार गरिरहेको भिडियो सामाजिक सञ्जालहरूमा भाइरल भइरहेको छ । 
उक्त घटनाका क्रममा करिब ८० लाख रुपैयाँ बराबरको क्षति भएको र ६४ लाख ८८ हजार बराबरको सामान लुटिएको भाटभटेनीले जनाएको छ । 

कर्मचारीहरूले रातभार खटिएर सरसफाइ र मर्मतसम्भार गरेपछि सो घटनाको भोलिपल्ट बिहानैदेखि उक्त सुपरमार्केट सञ्चालनमा आएको थियो ।