देशमा विकसित पछिल्लो राजनीतिक परिस्थितिलाई मध्यनजर गर्दै यही चैत्र १६ र १७ गते सम्पन्न पार्टी स्थायी समितिको बैठकका निर्णयहरू सार्वजनिक जानकारीका लागि यो प्रेस वक्तव्य जारी गरिएको छ।

१. नेपालको इतिहासमा पटक(पटक दोहोरिने राष्ट्रिय आत्मसमर्पणवाद, सर्वहारावादी आन्दोलनमा पैदा हुने दक्षिणपन्थी आत्मसमर्पणवाद, तथा साम्राज्यवादी षडयन्त्रको परिणामस्वरूप स्थापित कथित लोकतान्त्रिक गणतन्त्र, जनताको वास्तविक गणतन्त्र नभएर मुठ्ठीभर दलाल पुँजीपति वर्गको स्वार्थ पूरा गर्ने दलाल पुँजीवादी गणतन्त्र भएको हाम्रो स्पष्ट धारणा रहेको छ।

यस प्रणालीले जनतामाथि थोपरेको चरम भ्रष्टाचार, शोषण, उत्पीडन, र राष्ट्रघात विरुद्ध बढ्दै गएको जनआक्रोशलाई कहिले यथास्थितिवादी त कहिले प्रतिगमनकारीहरूले दुरुपयोग गर्ने गरेका छन्।
यसै सन्दर्भमा चैत्र १५ गतेको तीनकुने घटना पनि यस्तै षडयन्त्रको निरन्तरता भएको हाम्रो ठहर छ।
उक्त घटनामा सरकार र राजावादी दुवै पक्षबाट भएका अमानवीय, अराजनीतिक, र नृशंस व्यवहारको घोर निन्दा गर्दै हाम्रो पार्टी सशक्त रूपमा विरोध गर्दछ।

२. समाज विकासको स्वाभाविक प्रक्रियाअनुसार अबको अग्रगमन केवल समाजवादी गणतन्त्र हो।
यस प्रणालीले किसान(मजदुर, उत्पीडित जनसमुदाय, तथा सच्चा देशभक्तहरूको वास्तविक नेतृत्व र प्रतिनिधित्व गर्नेछ।

तसर्थ, हाम्रो पार्टी सम्पूर्ण जनसमुदायमा हार्दिक अपिल गर्दै समाजवादी गणतन्त्रको पक्षमा अभिमत प्रकट गर्न यही वैशाख १८ गते अन्तर्राष्ट्रिय मजदुर दिवसको अवसरमा काठमाण्डौंमा लाल मार्चसहितको जनसभा गर्ने निर्णय लिएको छ।

३. यही चैत्र १० गतेदेखि देशव्यापी सञ्चालित ूभ्रष्ट दलाल पुँजीवादी व्यवस्थाका विरुद्ध जनसंघर्ष अभियानू लाई पश्चगमन र यथास्थितिवादको भण्डाफोर गर्दै समाजवादी गणतन्त्रको पक्षमा जनमत निर्माण गर्ने विविध जनपरिचालनका कार्यक्रमहरूसहित सम्पन्न गर्ने निर्णय गरिएको छ।

४. वैज्ञानिक समाजवादी क्रान्तिका पक्षधर शक्तिहरू, पश्चगमन र यथास्थिति विरुद्ध संघर्षरत शक्तिहरूसँग आवश्यक कार्यगत एकता, तथा क्रान्तिकारी शक्तिहरूबीचको सहकार्य सुनिश्चित गर्न पार्टीका तर्फबाट समुचित समन्वय गर्ने निर्णय गरिएको छ।