अमेरिकाको वाशिंगटन डि.सी.स्थित मेट्रो एरियामा सेप्टेम्बर २९ देखि अक्टुबर १ सम्म आयोजना हुन लागेको बिश्व साँस्कृतिक उत्सव २०२३ मा १८० राष्ट्रहरूबाट प्रतिनिधित्व गर्दै आफ्नो मौलिक संस्कृतिहरू सम्बन्धी प्रस्तुति गर्दैछन् । संसारभरका विभिन्न संस्कृतिहरूलाई एकै ठाउँमा ल्याई एकै सुत्रमा बाँध्ने जमर्को आर्ट अफ लिभिङ्गका संस्थापक तथा आध्यातमिक गुरू श्री रविशंकरले गरेका हुन् । हालसम्म ५ लाख भन्दा बढी सहभागीहरूले कार्यक्रममा सरिक भै संसार भर छरिएका सांस्कृतिक विविधताको महत्वमाथि एक्यबद्धता जनाएका छन् ।

उक्त कार्यक्रममा विभिन्न राष्ट्रहरूले आफ्नो देशको भेषभुषा, नृत्य, संगीत तथा परिकारहरूको प्रस्तुति यी तीन दिनमा गर्ने छन् । विश्वभरका १८० राष्ट्रहरूबाट १७,००० कलाकारहरू सम्मिलित भई ६१ वटा नृत्यहरू प्रस्तुत हुँदैछन् ।

नेपाल पनि यस संस्कृतिक उत्सवमा सहभागिता हुँदैछ र नेपालको विभिन्न समुदायको सात मौलिक नृत्यहरू सोही समुदायको सांस्कृतिक पहिरण पहिरी प्रस्तुती गर्न १३ वर्ष देखि ६० वर्ष सम्मका १५० जना कलाकारहरू पुगिसकेका छन् । यी नृत्यहरूको निर्देशन चर्चित नृत्य प्रशिक्षक यज्ञमान शाक्यले गरेका छन् र विगत पाँच महिनादेखि नृत्य टोलीलाई प्रशिक्षण दिँदै छन् ।

नेपालको साँस्कृतिक टोलीको प्रायोजन राजेश बहादुर प्रधान तथा निभा माथेमा प्रधानले गरेका थिए । प्रधान दम्पती आर्ट अफ लिभिङको सक्रिय आजीवन सदस्य हुनुका साथै दया फाउन्डेसनमा पनि आबद्ध छन् । नेपालको ‘बिश्व सांस्कृतिक उत्सव २०२३’ मा सहभागिताले नेपाललाई विश्वमा चिनाउन सहयोगी हुने कुरा दया फाउन्डेसनका संस्थापक सदस्य राजेश बहादुर प्रधानले बताए । 

अमेरिकामा बसोबास गरिरहेका गैर आवासीय नेपालीहरू माझ नेपाली संस्कृतिलाई जोगाउने हेतुले काम गर्दै आएको नेपाल एजुकेशन कल्चरल सेन्टरको नेतृत्व गरिरहेका अध्यक्ष सरोज प्रजापतिको प्रमुख संयोजकत्व तथा समन्वयमा अमेरिकामा बसोबास गरिरहेका गैर आवासीय नेपालीहरू यस कार्यक्रममा सहभागीता जनाउँदै छन् । सो कार्यक्रमको स्वागत कमिटीको नेतृत्व यु.एन.का जेनेरल सेक्रेटरी बान–कि–मुनले गरेका छन् भने नेपालका प्रतिनिधि सभा सदस्य तथा उद्योगी विनोद चौधरी पनि यस कार्यक्रमको स्वागत कमिटीमा सरिक हुनेछन् । 

यस वर्ष हुन लागेको ’बिश्व संस्कृतिक उत्सव २०२३ ’ चौथो संस्करण हो, सन् २००६ मा बैंगलोरमा आयोजना भएको पहिलो संस्करणमा २५ लाख सहभागी थिए, त्यसैगरी दोश्रो संस्करण जुन बर्लिनमा सन् २०११ मा सम्पन्न भएको थियो त्यसमा ७० हजार सहभागी थिए भने तेस्रो संस्करण सन् २०१६ मा दिल्लीमा आयोजित भएको थियो जसमा ३७ लाख सहभागी थिए ।