काठमाडौँ / मुक्तिनाथ विकास बैंक लिमिटेडले पुस २८ गते वार्षिक साधारण सभा गर्ने निर्णय गरेको छ । बैंकले गत आर्थिक वर्ष ०७९/८० को मुनाफाबाट कुल १०.२६ प्रतिशत लाभांश वितरण गर्ने प्रस्ताव गरेको हो । 

कम्पनीले हाल कायम चुक्तापूँजी ६ अर्ब ४२ करोड ९ हजार रूपैयाँको आधारमा ९ दशमलव ७५ प्रतिशत बोनस शेयर र कर प्रयोजनका लागि ०.५१३२ प्रतिशत नगद लाभांश वितरण गर्ने प्रस्ताव गरेको हो । 

कम्पनीले यस वर्ष गत वर्षभन्दा कम लाभांश वितरण गर्न लागेको हो । गत वर्ष कम्पनीले १३.५० प्रतिशत बोनस शेयर र कर प्रयोजनका लागि ०.७१ प्रतिशत नगद लाभांश वितरण गरेको थियो ।

प्रस्तावित लाभांश सहित अन्य विविध प्रस्ताव पारितका लागि कम्पनीले सिटी स्वक्वायर, पोखरामा दिनको १ बजे सभा गर्ने निर्णय गरेको हो । 

सभाले कम्पनी र कम्पनीको सहायक कम्पनी मुक्तिनाथ क्यापिटलको गत आर्थिक वर्षको वार्षिक प्रतिवेदन सहितका वित्तीय विवरणहरू पारित गर्नुका साथै चालू आर्थिक वर्षको लागि लेखापरिक्षक नियुक्ती र निजको पारिश्रमिक निर्धारणको विषय पनि टुङ्ग्याउनेछ । 

यस वर्षको बोनस वितरण पछि कम्पनीको चुक्तापूँजी ७ अर्ब ४ करोड ६९ लाख ३८ हजार रूपैयाँ कायम हुने भएकाले सोही बमोजिम प्रबन्धपत्र संशोधनका लागि सम्पूर्ण अख्तियारी सञ्चालक समितिलाई दिने निर्णय पनि सभाले गर्नेछ ।

साथै संस्थापक शेयरधनीको तर्फबाट ३ जना र सर्वसाधारण शेयरधनीको तर्फबाट दुई जना सञ्चालक निर्वाचनको प्रस्ताव पनि सभाका लागि तय भएको छ । 

साधारण सभा प्रयोजनका लागि कम्पनीले पुस १९ गते एक दिन बुक क्लोज गर्ने भएको छ । बुक क्लोजको आधारमा पुस १८ गतेसम्म कायम शेयरधनीहरूले मात्र सभामा भाग लिन र लाभांश प्राप्त गर्न सक्नेछन् ।