काठमाडौँ / चालु आर्थिक बर्ष २०८०/८१ को आठ महिनाको अवधि विकास बैंकहरुले साढे तीन अर्ब रुपैयाँ भन्दा बढी खुद नाफा कमाएका छन् ।
नेपाल राष्ट्र बैंकले सार्वजनिक गरेको चालु आर्थिक वर्षको फागुन मसान्तसम्मको तथ्याङ्ग अनुसार हाल संचालनमा रहेका १७ वटा विकास बैंकहरुले ३ अर्ब ५१ करोड ७५ लाख रुपैयाँ नाफा कमाएका हुन् ।
चार विकास बैंकको नाफा ऋणात्मक
फागुन मसान्तसम्ममा चार विकास बैंकको नाफा नोक्सानमा रहेको छ । यस अवधिमा एक्सेल डेभलपमेन्ट बैंक २४ करोड ३० लाख रुपैयाँ ऋणात्मक रहेको राष्ट्र बैंकको तथ्याङ्गमा देखाएको छ ।
यस्तै, सप्तकोसी डेभलपमेन्ट बैंक १३ करोड ६२ लाख रुपैयाँ, नारायणी डेभलपमेन्ट बैंक ७४ लाख र साल्पा विकास बैंक २५ लाख रुपैयाँ ऋणात्मक रहेको छ ।
मुक्तिनाथ विकास बैंकको नाफा सार्वधिक
चालु आर्थिक बर्षको आठ महिनामा सबैभन्दा धेरै नाफा आर्जन गर्नेमा मुक्तिनाथ विकास बैंक रहेको छ । यस अवधीमा मुक्तिनाथ विकास बैंकले ६५ करोड ९९ लाख रुपैयाँ नाफा आर्जन गरेको छ ।
यस्तै, दोस्रो नम्बरमा रहेको गरिमा विकास बैंक रहेको छ । यस बैंकले ६५ करोड २२ लाख रुपैयाँ नाफा कमाएको राष्ट्र बैंकको तथ्याङ्गले देखाएको छ ।
अन्य कुन बैंकको नाफा कति ?
विकास बैंकमा नाफा कमाउने तेस्रो स्थानमा शाइन रेसुङ्गा डेभलपमेन्ट बैंकले ५२ करोड २७ लाख रुपैयाँ नाफा गरेको छ । यता, नाफा कमाउने चौथो नम्बरमा रहेको महालक्ष्मी विकास बैंकले ४० करोड ७ लाख रुपैयाँ नाफा आर्जन गरेको छ ।
यस्तै, कामना सेवा विकास बैंकले ३८ करोड १५ लाख रुपैयाँ, लुम्बिनी विकास बैंकले २७ करोड ९७ लाख रुपैयाँ, ज्योति विकास बैंकले २५ करोड ७७ लाख रुपैयाँ र सांग्रिला डेभलपमेन्ट बैंकले २१ करोड ४९ लाख रुपैयाँ नाफा कमाएको छ ।
समिक्षा अवधिमा कर्णाली डेभलपमेन्ट बैंकले ४ करोड ५४ लाख, मितेरी डेभलपमेन्ट बैैंकले ४ करोड २ लाख रुपैयाँ, सिन्धु विकास बैंकले २ करोड, ग्रिन डेभलपमेन्ट बैंकले १ करोड ९४ लाख रुपैयाँ, कर्पोरेट डेभलपमेन्ट बैंकले १ करोड २५ लाख रुपैयाँ नाफा कमाएको छ ।
