काठमाडौँ / चालु आर्थिक बर्ष २०८०/८१ को बैशाख मसान्तसम्ममा आयात– निर्यात दुवै घटेको देखिएको छ ।
भन्सार विभागले सार्वजनिक गरेको वैदेशिक व्यापार तथ्याङ्क अनुसार चालु आर्थिक बर्षको १० महिनामा आयात २.३९ प्रतिशतले घटेको छ भने निर्यात ३.६१ प्रतिशतले घटेको देखिएको हो ।
विभागको तथ्याङ्क अनुसार १० महिनामा आयात २.३९ प्रतिशतले घटेर १३ खर्ब ३ अर्ब ३५ करोड रुपैयाँ बराबरको वस्तु आयात भएको छ । गत वर्ष सोही अवधिमा १३ खर्ब ३५ अर्ब ३२ करोड रुपैयाँ बराबरको वस्तु आयात गरिएको छ ।
यस्तै, साउनदेखि वैशाखसम्म १ खर्ब २६ अर्ब १७ करोड रुपैयाँ बराबरको वस्तु निर्यात भएको भन्सार विभागले जनाएको छ । गत आर्थिक वर्ष सोही अवधिमा १ खर्ब ३० अर्ब ९० करोड रुपैयाँ बराबरको वस्तु निर्यात भएको थियो ।
तथ्याङ्क अनुसार चालु आर्थिक वर्षको १० महिनामा व्यापार घाटा ११ खर्ब ७७ अर्ब १८ करोड पुगेको छ । गत वर्ष सोही अवधिमा व्यापार घाटा १२ खर्ब ४ अर्ब ४२ करोड रुपैयाँ थियो ।
