काठमाडौँ / शुक्रबार रातिदेखिको अविरल वर्षाका कारण उत्पन्न बाढी र पहिरोका कारण देशभरमा ३६ महत्त्वपूर्ण सडक रूपमा अवरुद्ध भएका छन् । केही सडकहरू एकतर्फी रूपमा सञ्चालन भए पनि केही सडकहरू अझै सञ्चालन हुन सकेका छैनन् ।
यसैगरी, वर्षाका कारण देशभर आएको बाढी पहिरामा परी हालसम्म पाँचजनाको मृत्यु भएको छ ।
अहिलेसम्म सातजना बेपत्ता भएका छन् भने १४ जना घाइते भएका गृह मन्त्रालयस्थित विपद् तथा द्वन्द्व व्यवस्थापन महाशाखाका सहसचिव विष्णु भुसालले जानकारी दिए ।
“पहिरामा परी काठमाडौँ नागार्जुनमा एक, स्याङ्जामा दुई तथा पर्वतमा दुईजना गरी पाँचजनाको मृत्यु भएको छ भने सातजना बेपत्ता र १४ घाइते भएका छन् ”, उले भने ।
यसैगरी, बाढीपहिराका कारण बेपत्ता हुनेहरुमा तनहुँमा तीन, स्याङ्जामा एक, दाङमा एक, दोलखामा एकजना रहेका तथा घाइते हुनेहरूमा जाजरकोटमा एक, स्याङ्जामा सात, तनहुँ चार, ओखलढुङ्गा दुईजना रहेका सहसचिव भुसालले बताए ।
यसैगरी काठमाडौँको विभिन्न स्थानमा सडकमा वर्षाका कारण पानी जमेपछि सवारीसाधन सञ्चालनमा समस्या भएको छ । सप्तकोशी, राप्ती, नारायणीलगायतका नदीले सतर्कताको तह पार गरेको छ ।
नवलपरासी (बर्दघाट–सुस्तापूर्व)को गैँडाकोट–२ बोटेटोलमा शनिबार पसेको नारायणी नदीको बाढी । बस्तीमा बाढी पस्दा करिब १०० घरका ४०० जना प्रभावित भएका छन् ।
अविरल वर्षाका कारण नारायणी नदीमा आएको बाढीले शनिबार घर डुबानमा परेपछि नवलपरासी (बर्दघाट–सुस्तापूर्व)को गैँडाकोट–२ बोटेटोलका बासिन्दा सुरक्षित स्थानतर्फ जाँदै ।
अविरल वर्षाका कारण नारायणी नदीमा आएको बाढीबाट घर डुबानमा परेपछि नवलपरासी (बर्दघाट–सुस्तापूर्व)को गैँडाकोट–२ बोटेटोलका बासिन्दा सुरक्षित स्थानमा जाँदै ।
ड्रोनबाट खिचिएको मकवानपुरको हेटौँडा उपमहानगरपालिका वडा नं ५ स्थित शान्तिनगर भएको डुबान । अविरल वर्षाले सिँचाइटोल, शान्तिनगर, पिप्ले, कर्रा क्षेत्र डुबानमा परेको छ ।
हेटौँडा उपमहानगरपालिका–५ पिप्लेस्थित कर्रा खोलामा आएको बाढीले डुबानमा परेका स्थानीयवासीलाई नगर प्रहरी र स्थानीयद्धारा उद्दार गरिँदै । शनिबार परेको पानीले कर्रा खोलामा पानीको सतह बढेपछि, पिप्ले, शान्तिनगर, कर्राक्षेत्रका करिब २५ घरपरिवार डुबानमा परेका छन् ।
