काठमाडौँ / प्राइम कमर्सियल बैंक लिमिटेडले १० वर्ष अवधि तथा वार्षिक ८ प्रतिशत ब्याजदर भएको ‘८% प्राइम डिबेञ्चर २०९१’ नामक ऋणपत्र निष्काशन गर्ने भएका छ । बैंकले प्रतिऋणपत्र अंकित मूल्य एक हजार रुपैयाँ दरको ३० लाख कित्ता ऋणपत्र निष्काशन गर्ने भएको हो ।
बैंकले ३ अर्ब बराबरको ऋणपत्रमध्ये ६० प्रतिशत अर्थात १८ लाख कित्ताले हुने रकम १ अर्ब ८० करोड रुपैयाँ बराबरको ऋणपूँजी व्यक्तिगत तवरबाट बिक्री गरिने तथा ५ प्रतिशत अर्थात ६० हजार कित्ता ऋणपत्र सामूहिक लगानी कोषका लागि सुरक्षित गरिएको समेत गरी ४० प्रतिशत अर्थात १२ लाख कित्ताले हुन आउने रकम १ अर्ब २० करोड ऋणपत्र सर्वसाधारणमा सार्वजनिक निष्काशन गर्ने भएको छ ।
ऋणपत्र निष्काशन गर्नका लागि बैंकले सानिमा क्यापिटल लिमिटेडलाई निष्काशन तथा बिक्री प्रबन्धक साथै डिबेञ्चर ट्रष्टीको रुपमा नियुक्त गरेको छ ।
उक्त क्रममा प्राइम कमर्सियल बैंक लिमिटेडका तर्फबाट प्रमुख कार्यकारी अधिकृत सञ्जिव मानन्धरले र सानिमा क्यापिटल लिमिटेडका तर्फबाट प्रमुख कार्यकारी अधिकृत भिष्म राज चालिसेले सम्झौता पत्रमा हस्ताक्षर गरे ।
