काठमाडौँ / साताको पहिलो कारोबार दिन आइतबार नेप्से परिसूचक २१.१२ अङ्कले घटेको छ । यो दिन नेप्से परिसूचक घटेर २ हजार ६०९ बिन्दुमा झरेको हो ।
सेन्सेटिभ इन्डेक्स पनि आज २.४६ अङ्कले घटेर ४ सय ४८.९९ बिन्दु कायम भएको छ । आइतबार २४३ ओटा कम्पनीको सेयर कारोबार हुँदा १७२ ओटा कम्पनीको सेयर मूल्य ओरालो लागेको छ । त्यस्तै, ६९ ओटा कम्पनीको सेयर मूल्य बढ्दा दुई ओटाको स्थिर रहेको छ ।
यो दिन कुल ५ अर्ब ४७ करोड ४८ लाख ६८ हजार रुपैयाँ बराबरको सेयर खरिद बिक्री भएको छ । नेप्से घटेसँगै बजार पुँजीकरण रकम ४३ खर्ब २८ अर्ब ५१ करोड कायम भएको छ ।
कुल ३१६ धितोपत्रको कारोबारमा १ करोड १० लाख ९९ हजार २३९ कित्ता सेयर ६६ हजार ७७४ पटकमा खरिद बिक्री भएको छ ।
यो दिन महिला लघुवित्त कम्पनीको सेयर मूल्यमा मात्रै पोजेटिभ सर्किट लागेको छ भने आत्मनिर्भर लघुवित्त वित्तीय संस्थाको सेयर मूल्य ९.९८ प्रतिशतले बढेको छ ।
यता, तीन ओटा विकास बैंकसहित पाँच ओटा कम्पनीको सेयर मूल्यमा नेगेटिभ सर्किट लागेको छ । कर्णाली डेभलपमेन्ट बैंकलाई समस्याग्रस्त घोषित गरेसँगै केही विकास बैंक र वित्त कम्पनीको सेयर मूल्यमा पहिरो जाने क्रम जारी छ ।
नेप्सेका अनुसार आज सर्पोट माइक्रोफाइनान्स, नारायणी विकास बैंक, सप्तकोशी डेभलपमेन्ट बैंक, जानकी फाइनान्स र सिन्धु विकास बैंकको सेयर मूल्यमा नेगेटिभ सर्किट लागेको हो । यता, जोशी हाइड्रोपावर र ग्रीन डेभलपमेन्ट बैंकको सेयर मूल्यमा पनि उच्च गिरावट आएको छ ।
आइतबारको कारोबार रकममा पनि प्रभु बैंकको हिस्सा बढी रहेको छ । यो कम्पनीको २६ करोड १० लाख ८२ हजार रुपैयाँ बराबरको सेयर कारोबार भएको हो ।
कारोबारमा आएका १३ ओटा उपसमूहमध्ये आज तीन ओटा बाहेक सबै समूहको पसिूचकमा पहिरो गएको छ । लघुवित्त समूहको परिसूचक १.१२ बढेको बजारमा अन्य र म्युचुअल फण्डको परिसूचक सामान्य मात्रै बढेको छ । यो दिन सर्वाधिक गुमाउनेमा वित्त समूहका लगानीकर्ताहरू छन् । यो समूहका लगानीकर्ताले ४.४७ प्रतिशतले गुमाउँदा विकास बैंक समूहका लगानीकर्ताहरूले २.६५ प्रतिशतले गुमाएका छन् ।
