काठमाडौँ /  पूर्वमिस नेपाल नम्रता श्रेष्ठको डेब्यु फिल्म ‘रंगी’आउँदो  शुक्रबारबाट प्रदर्शनमा आउँदैछ । सलोन सलिना फिल्मस् प्रालिको व्यानरमा निर्माण भएको  ‘रंगी’ फागुन २ गते प्रदर्शन हुन लागेको हो । मिस नेपाल एवम् नायिका श्रेष्ठले फिल्मको स्क्रिप्ट अनुसार आफ्नो क्यारेक्टर मन परेकाले अभिनय गरेको बताइन् । 

आफूलाई सुहाँउदो भूमिकाको खोजीमा रहेकाले रंगीमा सोचेजस्तै भूमिका मिलेकाले आफूले फिल्ममा अभिनय गरेको बताइन् । 

उनले भनिन्, “रंगीको स्क्रिप्ट पढ्दा स्कूले जीवन सम्झिए । यसमा मेरो क्यारेक्टर पनि रमाइलो खालको छ । म युवावस्थाको छु तर मेरो नेचर बच्चाको जस्तो छ ।”

बच्चाको लागि एउटा आमाको जस्तो भूमिका गर्नुपर्ने भएकाले पनि आफूलाई उक्त चलचित्रमा अभिनय गर्न मन लागेको उनले बताइन् । 

“मिस नेपालपछि धेरै सामाजिक कामहरूमा व्यस्त थिएँ । अब चाँही अभिनयमा प्रवेश गरौं भन्ने सोचेर रंगीमा सहमत भएको हुँ,” उनले अगाडि भनिन्, “हुनत मलाई फिल्महरूमा धेरै अफर आएको थिएन् । केहीले प्रस्ताव गरेका थिए । तर म सन्तुष्ट चाँही थिइन । किनभने त्यो एकदमै अनुभव भएका कलाकारले मात्र गर्नसक्ने खालको भूमिका आएको थियो । त्यसैले ती प्रस्तावहरूमा न्याय गर्नसक्छु जस्तो नै लागेको थिएन । त्यही भएकाले फिल्म गरेको थिइन् । त्यसपछि गर्नसक्ने खालको भूमिकाको खोजीमा चाँही थिएँ ।”

उनले रंगी फिल्ममा गरेको भूमिका सोचेको जस्तै भएको अनुभव सुनाइन् । स्क्रिप्ट एकदमै रमाइलो खालको लागेकाले डेब्यू गरेको बताइन् । 

साथै उनले पहिलो फिल्म भएकाले डर धेरै नै लागेको बताइन् । उनले पहिलो फिल्म चलेर या नचलेर भविष्य निर्धारित हुने भन्नेमा चाँही विश्वास नगरे पनि चल्यो भने अरू फिल्ममा राम्रो भूमिका पाउन सकिने उनको विश्वास छ ।

उनले भनिन्, “डर र चुनौती त भइहाल्छ । पहिलो फिल्म हो । हुनत पहिलो फिल्म चलेर या नचलेर भविष्य निर्धारित हुने भन्नेमा चाँही म विश्वास गर्दिन् । तर पनि चल्यो भने त राम्रो मेरो लागि पनि राम्रो हुन्छ । निर्माण टिमपनि उत्साहित हुन्छ । म पनि मेकर्सको आँखामा पर्छु होला र आशावादी पनि छु,” उनले अगाडि भनिन्, “डर पनि त्यति नै लागिरहेको छ । तर पनि फिल्मको मेकर र डाइरेक्टरप्रति पूरा विश्वास छ । फिल्म राम्रो चल्छ, फिल्म डबिङ गर्ने बेलामा पनि हेर्दाखेरी एउटा राम्रो स्टोरी बनेको रहेछ जस्तो लाग्यो । त्यही भएर पनि उहाँहरूसँग डेव्यू गर्न रोजेँ र फिल्म सफल हुन्छ भन्नेमा विश्वस्त छु ।”

यसैगरी उनले फिल्म रंगीमा एउटा बाबा छोरीको सम्बन्ध एवम माया–प्रेमलाई देखाइएको बताइन् । उनले रंगीमा जीवनका कति धेरै रङहरू हुन्छन् त्यो सबै रङहरूलाई समेटेर रंगी बनाइएको जानकारी दिइन् । 

“रंगीचाँही एउटा बाबा–छोरीको सम्बन्धको कथा हो । साथसाथै जीवनको रङ भनिन्छ नि जीवनका कति धेरै रङहरू हुन्छन् ति सबै रङहरूलाई समेटेर रंङ्गी बनाइएको हो । तीत घण्टा छुट्याएर हल छिर्दा भरपूर रमाइलो हुनेछ । हसाउने, चित्त दुख्ने र आँखामा आँसु पनि देखिनसक्छ,”उनले भनिन्, “रंगीलाई ट्रेलरमा पनि देख्नुभएकै होला एउटा बाबा–छोरीको सम्बन्धलाई माया प्रेमलाई देखाइएको छ । एकजना बुबाले गर्नुपरेको संघर्ष देखाइएको छ ।”

नेपाली समाजकै कथा फिल्ममा समेटिएको अभिनेत्री श्रेष्ठको दावी छ । 

उनले थपिन्,“यस्तो कथा हाम्रो समाजमा पनि देखिरहेको हुन्छौँ । समाजमा घटिरहेको यस्तै घट्नाको सानो भाग हो रंगी । फिल्ममा मेरो क्यारेक्टर एकदमै संघर्षशील, स्वतन्त्र र शिक्षित केटीको रूपमा छ ।” 

प्राविधिक दृष्किोणबाट पनि फिल्म उत्कृष्ट बनेको उनको भनाइ छ । “फिल्मको कथावस्तु हेर्दा दैनिक जीवनमा घटिरहेको घट्ना पनि हो । बाबा–छोरीको माया र बाबाको इमोसन भन्नेवित्तिकै छुट्टै इम्प्रेसन परेको हुन्छ । बाबाले यो गर्दिनु भएन,  त्यो गर्दिनु भएन वा माया देखाउनु भएन् भन्ने हुन्छ तर एउटा बाबाले कस्तो संघर्ष गरिरहनुभएको छ भन्ने कथा यसमा छ,” उनले भनिन् । 

उनले आगामी दिनमा पनि फिल्म क्षेत्रलाई निरन्तरता दिने सोच रहेको बताएकी छन् । उनले जबसम्म फिल्म क्षेत्रमा राम्रो खालको योगदान दिन सक्दिन तबसम्म अभिनय गरिरहने बताइन् । 

अभिनेत्री श्रेष्ठले भनिन्, “आगामी दिनमा पनि फिल्म क्षेत्रलाई निरन्तरता दिने सोच छ । म एउटै चिजमा धेरै टिकिरहन सक्ने मान्छे चाँही होइन् । त्यसैले नयाँ–नयाँ कुराको अनुभव लिन मन चाँही लाग्छ । जबसम्म फिल्म क्षेत्रमा मेरो राम्रो खालको योगदान हुनेवाला छ र सन्तुष्टि चाँही काम गरेर मिलाउनेछु । त्यसैले यस क्षेत्रमा देखिरहनुहुनेछ । दुबै साइडबाट राम्रो भयो भने चाँही निरन्तरता दिन मन छ ।”

उनले आफ्नो पहिलो फिल्म भएकाले पनि फिल्मको प्रोमोसन नै सबैभन्दा चुनौतीको रूपमा हेरेको बताइन् । 

“फिल्म खेलेर मात्र नहुने रहेछ । प्रमोसनका लागि दौडिरहनुपर्ने रहेछ । दर्शकसामू पुर्याउनुपर्ने वाध्यता छ । यसपाली भगवानले पनि जुराइदिनुभयो र ठ्याक्कै फागुन २ गते प्रेम दिवसका दिन एउटा प्रेमको कथा आउँदैछ,” उनले भनिन् । 

फिल्म अभिनयको अनुभव सुनाउने क्रममा उनले भ्यालेन्टाइन डे मनाएको स्मरण आफूसँग नरहेको बताइन् । यस दिवसका अवसरमा विभिन्न अफरहरू पनि आउने भएकाले व्यापारी र ग्राहकहरूलाई राम्रो हुने उनको भनाइ छ । 

“भ्यालेन्टाइन डे मनाउने भनेको प्रेम गर्ने मान्छेहरूसँग मनाउने भन्ने हो । पार्टनर, श्रीमान–श्रीमती, परिवार सबैसँग मनाउन सकिन्छ । तर यसलाई नराम्रो दृष्टिले मनाउने पनि गरिएको छ । हामीले यसलाई कन्ट्रोल गर्नुपर्छ, व्यालेन्स गर्नुपर्छ,” उनले भनिन् ।

पछिल्लो समय नेपाली समाजमा बढ्दै गएको सम्बन्ध विच्छेदका घटनाहरूबारे आफू अनभिज्ञ भएको श्रेष्ठले बताइन् । 

“मैले कसैसँग प्रेम राखेको पनि छैन, विहे पनि भएको छैन् । त्यसैले सम्बन्ध बिच्छेद नि भएको छैन् । त्यहि भएर सम्बन्ध बिच्छेदको प्रसंगमा बोल्ने अधिकार छैन् । किनभने दुईजना मान्छेले सम्बन्ध बिच्छेद गर्ने निर्णय गर्नुहुन्छ । उहाँहरूबीच के कुरा भएको हुन्छ त्यसबारे मलाई बोल्ने अधिकार छैन्,” उनले भनिन् ।

सम्बन्ध विच्छेदका घट्नाहरू कलाकारिता क्षेत्र भन्दापनि बाहिरी समाजमा धेरै भएको सुनाइन् ।

“बाहिरको समाजमा क्यामेरा लिएर कोही जाँदैन तर कलाकारहरूको बारेमा खोजतलास भइहाल्छ । कलाकारिता क्षेत्रमा पनि बिहे गरेर उदाहरणीय बन्नुभएकाहरू धेरै हुनुहुन्छ । सबैलाई एकै नजरले हेर्नुहुँदैन् । कतिपय ठाउँमा कलाकार भएता पनि सम्बन्धलााई राम्रोसँग लिएर जानुभएको छ,” उनले भनिन् । 

चारबर्ष अघि आफू मिस नेपालको ताज पहिरिएपछि धेरै फिल्म खेल्ने अवसर आएको सुनाउँदै फिल्मी क्षेत्र भनेको सरकारी जागिरजस्तो नभएकाले गर्नैपर्ने बाध्यता नरहेको बताइन् । 

“मलाई दुईवटा फिल्म मात्र गर्न मन लाग्यो भने पुग्यो भने विश्राम लिन पाउँछु । अबको २० वर्षसम्म पनि यही क्षेत्रमा हुन्छु भन्दापनि पाउँछु,” उनले भनिन् ।  

सुरेश न्यौपाने निर्देशित फिल्ममा नम्रतासहित सलोन बस्नेत, दिलीप रायमाझी, आयुषी ढकाल, उत्तम केसी लगायतको अभिनय छ । बाबुछोरीको भावनात्मक सम्बन्धको कथामा फिल्म आधारित छ ।

नम्रता सन् २०२२ की मिस नेपाल वल्र्ड विजेता हुन् । उनले टेलिभिजनको कमेडी शो ‘कमेडी दरबार’मा होस्टको रूपमा समेत काम गरिसकेकी छिन् । त्यसअघि हिमालय टिभीको गायन रियालिटी शो ‘नेपाल लोकस्टार’को पनि होस्ट गरेकी थिइन् ।
प्रमिला कार्की÷नेपाल न्यूज बैंक