काठमाडौँ / साताको तेस्रो कारोबार दिन मङ्गलबार पनि सेयर बजार घटेको छ । लगातार ९ दिन बढेको सेयर बजार १०औँ दिनमा सोमबारदेखि घट्न थालेको बजारले आज पनि निरन्तरता पाएको हो । 

लगानीकर्ताहरूको मन स्थिर हुन नसक्दा र छोटो अवधिमा नाफा कमाएर बाहिरिने लगानीकर्ताहरू हाबी हुँदा बजारमा बिक्री चाप बढेको देखिन्छ । 

आज नेप्से परिसूचक ३०.३६ अङ्कले घटेर २८४६.३० बिन्दुमा झरेको छ । हिजो सोमबार भने  २८७६.६६ बिन्दुमा झरेको थियो । २८९३.३६ बिन्दुमा पुगेर झरेको बजार बन्द हुने समयसम्म पनि उकालो लाग्न सकेन । 

नेप्सेसँगै आज कारोबार रकमसमेत घटेको छ । सोमबार १४ अर्ब २८ करोड ४५ लाख रुपैयाँ बराबरको सेयर कारोबार भएको बजारमा आज १२ अर्ब  ९४ करोड ६४ लाख ९३ हजार रुपैयाँ बराबरको मात्रै कारोबार भएको हो । 

मङ्गलबार ४१ ओटा कम्पनीको मात्रै सेयर मूल्य बढेको छ भने बाँकी १९८ कम्पनीको घटेको छ । ५ कम्पनीको मूल्य आज स्थिर रह्यो ।मङ्गलबार ३१८ कम्पनीको २ करोड ६३ लाख ८९ हजार ९१० कित्ता सेयर १ लाख २२ हजार ३३६ पटकमा किनबेच भए । 
 
आज पुँजीकरण रकम पनि घटेर ४७ खर्ब २६ अर्ब १६ करोड रुपैयाँ कायम भएको छ । 

मङ्गलबार कारोबारमा आएका सबै सेक्टरको परिसूचकमा पहिरो गएको छ । जसमा सर्वाधिक बढी उत्पादन तथा प्रशोधन समूह २.२१ प्रतिशतले घटेको छ । यसैगरी, निर्जीबन बिमा १.११ प्रतिशत, वित्त २.१० प्रतिशत, बैंकिङ १.०५ प्रतिशत, हाइड्रोपावर १.०८ प्रतिशत, लगानी १.७५ प्रतिशत लघुवित्त १.४१ प्रतिशतले घटेको छ । 

अन्य समूहको परिसूचकमा पनि आज १ प्रतिशतभन्दा कमको गिरावट आएको छ । कारोबारमा आएदेखि नै गार्डियन माइक्रो लाइफ इन्स्योरेन्सको सेयर मूल्यमा भइरहेको उच्च बृद्धि आज पनि कायमै छ । मूल्यमा पोजेटिभ सर्किट लागेको यो एकलौटी कम्पनी हो । प्रतिकित्ता १२५.६० रुपैयाँले मूल्य बढेर अन्तिम मूल्य आज १३८२ रुपैयाँ पुगेको छ । 

त्यस्तै, आरम्भ चौतारी लघुवित्त वित्तीय संस्थाको सेयर मूल्य ६.६६ प्रतिशतले बढेर प्रतिकित्ता ५०९१ रुपैयाँ कायम भएको छ । यता, सिन्धु विकास बैंकको लगानीकर्ताले आज पनि सबैभन्दा बढी गुमाएका छन् । यो कम्पनीको सेयर मूल्यमा नेगेटिभ सर्किट लागेको हो । प्रतिकित्ता १३७ रुपैयाँले घटेर सिन्धु विकासको अन्तिम मूल्य आज १२३३ रुपैयाँमा झरेको हो । 

त्यस्तै, सिर्जनशील लघुवित्त वित्तीय संस्थाको सेयर मूल्य पनि ९ प्रतिशत अर्थात २३३ रुपैयाँले घटेर २३५५ रुपैयाँ कायम भएको छ । नेपाल रिपब्लिक मिडियाको सेयर मूल्य पनि आज ७.४६ प्रतिशतले घटेर प्रतिकित ५४६ रुपैयाँ कायम भएको छ । 

आज पनि हिमालयन रिइन्स्योरेन्सको कारोबार रकममा सर्वाधिक बढी हिस्सा रहेको छ । कुल कारोबार रकममा यो कम्पनीको हिस्सा १ अर्ब ९ करोड ३० लाख ७८ हजार रुपैयाँ छ । 

त्यस्तै, दोस्रो स्थानमा रहेको  नेपाल पुनर्बिमा कम्पनीको आज ६४ करोड २५ लिाख ३५ हजार रुपैयाँ बराबरको सेयर कारोबार भएको छ । 
कारोबार बन्द हुने समयसम्म हिमालयनको सेयर मूल्य ११२४.१० रुपैयाँ छ भने नेपाल पुनर्बीमको १३४१ रुपैयाँ पुगेको छ । यी दुबै कम्पनीको सेयर मूल्य आज पनि बढेको हो । 

त्यस्तै, सेयर मूल्य घटेको सिन्धु विकास बैंकको ४७ करोड १३ लाख ८८ हजार रुपैयाँ बराबरको सेयर कारोबार भएको छ ।