काठमाडौँ / चालू आर्थिक वर्ष २०८०/८१ मा नेपालबाट अम्रिसोको निर्यात बढेको छ । भन्सार विभागले सार्वजनिक गरेको वैदेशिक व्यापार तथ्यांकअनुसार गत आर्थिक बर्षको साउन र भदौ महिनाको तुलनामा चालु आर्थिक बर्षमा अम्रिसोको निर्यात बढेको हो ।

चालू वर्षको दुई महिनाको अवधिमा नेपालबाट २१ करोड २९ लाख ९४ हजार रुपैयाँको अम्रिसो निर्यात भएको छ । यस अवधिमा नेपालबाट १७ लाख ७४ हजार किलोग्राम अम्रिसो निर्यात भएको तथ्यांकले देखाएको छ ।

गत आर्थिक वर्षको यही अवधिमा नेपालबाट जम्मा ११ करोड ३० लाख २२ हजार रुपैयाँको अम्रिसो निर्यात भएको थियो । गतवर्ष उक्त मूल्य बराबरको २२ लाख ६२ हजारभन्दा धेरै किलोग्राम अम्रिसो निर्यात भएको तथ्यांकमा देखिएको छ । यो चालू वर्षकोभन्दा १० करोडले कम हो ।

गत वर्षको सोहि अवधीसम्ममा २२ लाख ६२ हजार किलोग्राम अम्रिसो निर्यात भएको थियो । जबकी, चालू वर्षमा १७ लाख ७४ हजार किलोग्राम अम्रिसो निर्यात भएको छ । यसले गत वर्षकोभन्दा चालू वर्षमा परिमाण घटेपनि निर्यातबाट भित्रिएको रकम भने बढेको देखाउँछ ।

पहिलो महिना मात्रै १२ करोडको अम्रिसो निर्यात

चालु आर्थिक बर्ष २०८०/८१ को पहिलो महिना अर्थात साउन महिनामा १२ करोड ७ लाख ७९ हजार रुपैयाँ बराबरको १० लाख ६ हजार ४९० किलोग्राम अम्रिसो मूलुकबाट निर्यात भएको हो । नेपालले उक्त मूल्य बराबरको अम्रिसो भारतमा मात्रै निर्यात गरेको छ ।

तथ्याङ्क अनुसार यो निर्यात गत आर्थिक बर्ष २०७९/८० को साउन महिनाको तुलनामा बढी हो । गत वर्षको साउन महिनामा ५ करोड ५ लाख ४५ हजार रुपैयाँ बराबरको को १० लाख ११ हजार किलोग्राम अम्रिसो नेपालबाट अन्य मूलुकमा निर्यात भएको थियो ।

५ बर्षमा ३ अर्बको अम्रिसो निर्यात

विभागको तथ्याङ्क अनुसार पछिल्लो पाँच वर्षमा अम्रिसो निर्यातबाट तीन अर्ब ३३ करोड छ लाख ९२ हजार रुपैयाँ आम्दानी भएको छ । गत आर्थिक बर्ष २०७९/८० मा एक अर्ब ८८ लाख रुपैयाँको अम्रिसो भारत निर्यात भएको थियो । यस्तै, आर्थिक बर्ष २०७८/७९ मा ६९ करोड ९८ लाख ६२ हजार रुपैयाँको अम्रिसो नियात भएको छ । त्यस्तै आर्थिक बर्ष २०७७/७८ मा ६५ करोड ८८ लाख १३ हजार रुपैयाँको, आर्थिक बर्ष २०७६/७७मा ५५ करोड ७४ लाख ७८ हजार रुपैयाँको तथा आर्थिक बर्ष २०७५/७६ मा रु ४० करोड ५७ लाख ३९ हजार रुपैयाँको अम्रिसो मूलुकबाट निर्यात भएको छ ।