काठमाडौँ / नेपाल इन्भेस्टमेन्ट मेगा बैंक लिमिटेडको नाफा चालु आर्थिक बर्ष २०८०/८१ को पहिलो त्रैमाससम्ममा  ३३.४६ प्रतिशतले वृद्धि भएको छ । गत आर्थिक वर्षको पहिलो त्रैमासमा १ अर्ब १४ करोड ५ लाख रुपैयाँ खुद नाफा कमाएको बैंकले यो वर्ष सोही अवधिमा १ अर्ब ५२ करोड २२ लाख रुपैयाँ नाफा कमाउन सफल भएको हो । 

समीक्षा अवधिमा बैंकको नाफासँगै खुद ब्याज आम्दानी र सञ्चालन नाफामा पनि वृद्धि भएको छ । त्यस्तै, असोज मसान्तसम्म बैंकले ४ अर्ब १६ करोड १० लाख रुपैयाँ खुद ब्याज आम्दानी गरेको छ । 

यस बर्षमा बैंकको खुद ब्याज आम्दानी ९५.४० प्रतिशतले वृद्धि भएको हो । गत वर्ष यसको खुद ब्याज आम्दानी २ अर्ब १२ करोड ९५ लाख रुपैयाँ रहेको थियो । 

यस्तै, समीक्षा अवधिमा बैंकको सञ्चालन नाफा ५९.९० प्रतिशतले बढेर २ अर्ब ६० करोड ५४ लाख पुगेको छ । गत वर्ष बैंकको यस्तो नाफा १ अर्ब ६२ करोड ९३ लाख भन्दा धेरै थियो । 

यस बैंकले इम्पेयरमेन्ट चार्जका लागि ६४ करोड ६ लाख रुपैयाँ छुट्याएको छ । गत वर्ष २८ करोड १६ लाख रुपैयाँ उक्त शीर्षकमा छुटयाएको थियो । खराब कर्जा बढेसँगै बैंकको इम्पेयरमेन्ट चार्ज पनि बढ्न पुगेको हो । 

हाल यस बैंकको चुक्ता पुँजी ३४ अर्ब १२ करोड ८५ लाख रुपैयाँ कायम भएको छ । यसको जगेडा कोषमा २५ अर्ब ८९ करोड ३८ लाख रुपैयाँ जम्मा रहेको छ । यता, बैंकको एनपीएल बढेर ४.८३ प्रतिशत पुगेको छ । गत वर्ष १.५७ प्रतिशत थियो । 

यसको प्रतिसेयर आम्दानी भने २४ रुपैयाँ ९२ पैसाबाट घटेर १७ रुपैयाँ ८४ पैसा कायम भएको छ । त्यसैगरी, प्रतिसेयर नेटवर्थ पनि १८ रुपैयाँ ९५ पैसाले घटेर १७३ रुपैयाँ ३७ पैसा रहेको छ । समीक्षा अवधिमा बैंकको वितरणयोग्य नाफा भने ऋणात्मक रहेको छ।