चितवन / कृषि तथा वन विज्ञान विश्व विद्यालय रामपुरमा सञ्चालन भएको पहिलो कृषि वैज्ञानिक सम्मेलन तथा स्नातक कार्यशाला आज सम्पन्न भएको छ । सम्मेलनको विश्वविद्यालय अनुदान आयोगका सदस्यसचिव प्राडा शङ्कर भण्डारीले एक समारोहबीच समापन गरेका हुन्। उनले कृषि क्षेत्रमा गरिएको अनुसन्धानले कृषकको समस्या समाधान गर्न सक्नुपर्ने बताए ।
विश्वविद्यालयका उपकुलपति प्राडा पुण्यप्रसाद रेग्मीले कृषि क्षेत्रमा भएको पहिलो प्रयास भएकाले यसलाई अझै परिस्कृत र परिमार्जित गर्दै लैजाने बताए । विश्वविद्यालयले हरेक वर्ष यस्ता सम्मेलन गर्ने उनले जानकारी दिए। अनुसन्धानलाई किसानसँग जोडेर काम गर्ने गरी कार्यक्रम गर्नुपर्ने उनको भनाइ थियो ।
कार्यक्रममा सहकारी विकास बोर्डका सहअध्यक्ष मित्रराज दवाडी, विश्वविद्यालय सेवा आयोगका अध्यक्ष कल्याणी मिश्र, रजिष्ट्रार शारदा थपलियाल, प्राडा लालप्रसाद हुमागाइँले अध्ययन अनुसन्धानका क्रममा भएका प्रगतिहरूलाई सहज रूपमा कृषकले बुझ्ने गरी अघि बढाइनुपर्ने बताए ।
कृषि क्षेत्रमा परिवर्तन गर्नका लागि यस्ता किसिमका कार्यक्रम प्रभावकारी हुने उनीहरूको भनाइ थियो । यही मङ्सिर ७ गतेदेखि सञ्चालन गरिएको सम्मेलनमा देश तथा विदेशका तीन सय जनाको सहभागिता रहेको थियो ।
कार्यक्रम संयोजक एवं विश्वविद्यालयका अनुसन्धान निर्देशक डा ऋषिराम कट्टेलका अनुसार सम्मेलनमा नेपालसहित भारत, अमेरिका, जापान, क्यानडा, ताइवानलगायत देशका कृषि वैज्ञानिकहरूले एक सय १३ वटा कार्यपत्र प्रस्तुत गरेका थिए ।
तीन दिनसम्म चलेको सम्मेलनमा कृषि क्षेत्रको समस्या र समाधानका लागि गरिएका कार्यबारे समूहगत छलफल भएको थियो ।
