काठमाडौँ / गत आर्थिक बर्ष २०७९/८० मा नेपाल राष्ट्र बैंकले ८७ अर्ब भन्दा बढि नाफा कमाएको छ । 

राष्ट्र बैंकको लेखापरिक्षण गरिएको वित्तीय विवरण अनुसार बैंकले आर्थिक वर्ष ७९/८० मा ८७ अर्ब ६० करोड ३७ लाख ४५ हजार ४ सय ४८ रुपैयाँ खुद नाफा कमाएको हो । अघिल्लो वर्षको तुलनामा राष्ट्र बैंकको खुद नाफा २९.२५ प्रतिशतले बढेको हो । अघिल्लो आर्थिक बर्ष २०७८/७९ मा राष्ट्र बैंकको खुद नाफा ६१ अर्ब ९८ करोड ७ लाख १३ हजार रुपेयाँ रहेको थियो । 

यो नाफा बैंकसँग मौज्दात रहेको सुन, चाँदी तथा विदेशी मुद्रा सञ्चितिको अहिले मूल्य अनुसार गरिएको मूल्यांकनको आधारमा समेत भएको हो । 

अहिलेको मूल्य अनुसार मौज्दात रहेको सुन, चाँदीमा राष्ट्र बैंकलाई १७ अर्ब ११ करोड र विदेशी मुद्रामा १० अर्ब रूपैयाँ नाफा छ । यसबाहेक पनि बैंकको ६० अर्ब ४८ करोड रूपैयाँ नाफा भएको छ । जबकी अघिल्लो वर्ष बैंकको यस्तो नाफा २८ अर्ब ४२ करोड रूपैयाँ छ ।

बैंकको खुद ब्याज आम्दानी ३३ अर्बबाट बढेर ६२ अर्ब रूपैयाँ पुगेको छ । विदेशी मुद्रामा भएको खुद ब्याज आम्दानी ४७ अर्ब २२ करोड र घरेलु मुद्रामा रहेको वित्तीय सम्पत्तिबाट भएको खुद ब्याज आम्दानी १५ अर्ब ३४ करोड रूपैयाँ छ ।

यस्तै, आर्थिक वर्ष २०७९/८० मा बैंकको खुद सञ्चालन आम्दानी अघिल्लो वर्षको तुलनामा ८६.५७ प्रतिशतले वृद्धि भई ६६ अर्ब ९२ करोड ७१ लाख ३३ हजार कायम भएको छ । अब २०७८/७९ मा यस्तो आम्दानी ३५ अर्ब ८७ करोड २१ लाख ४७८ हजार थियो ।

बैंकले ४ अर्ब ४८ करोड खुद अन्य आम्दानी गरेको छ । फि, कमिसनबाट १२ करोड, सुनको कारोबारबाट ५८ करोड, विदेशी मुद्राको कारोबारबाट २ अर्ब ४३ करोड कमाएको छ ।

बैंकको कर्मचारी खर्च ३ अर्ब ४८ करोडबाट बढेर ३ अर्ब ९२ करोड पुगेको छ । बैंकका गभर्नर, डेपुटी गभर्नर लगायतको पारिश्रमिक र भक्ता दुवै बढेको छ । गभर्नरको पारिश्रमिक भने १३ लाख ९४ हजारबाट बढेर १६ लाख ३२ हजार पुगेको छ ।

१८ लाख बराबर भक्ता बुझेका गभर्नरले गत आर्थिक वर्षमा भने ४४ लाख रूपैयाँ भक्तालगायत बुझेका छन् । गभर्नर र डेपुटी गभर्नरको पारिश्रमिक सहित समग्रमा सञ्चालक समितिलाई एक करोड ७५ लाख खर्चिएको राष्ट्र बैंकले यसपटक भने २ करोड ४ लाख खर्चिएको छ । 

गत कात्तिक २२ गते बैंकको सञ्चालक समितिको बैठकले उक्त मुनाफाबाट विभिन्न आवश्यक कोषहरूमा छुट्ट्याउनु पर्ने रकम विनियोजन गरी बाँकी बचत रकम २५ अर्ब नेपाल सरकारलाई उपलब्ध गराउने निर्णय गरेको छ ।