काठमाडौँ / हस्पिटल फर एडभान्स्ड मेडिसिन एण्ड सर्जरी लिमिटेड (ह्याम्स अस्पताल)ले प्राथमिक सेयर (आइपिओ) निष्काशन गर्ने भएको छ । मुक्तिनाथ क्यापिटल लिमिटेडको निष्काशन तथा बिक्री प्रबन्धकत्वमा कम्पनीले ११ लाख २५ हजार कित्ता सेयर सर्वसाधारणका लागि आइपिओ निष्काशन गर्ने भएको हो । 

यससँगै, ह्याम्स अस्पताल नेपालको पुँजी बजारमा प्रवेश गर्ने स्वास्थ्य क्षेत्रको पहिलो कम्पनी बन्ने भएको छ । आइपिओ निष्काशन गर्न कम्पनीले पुस ६ गते नेपाल धितोपत्र बोर्डको स्वीकृतीको लागि निवेदन दिइएको जनाएको छ । 

अस्पतालले आफ्नो जारी पूँजीको १५ प्रतिशतले हुन आउने कूल अर्थात ११ करोड २५ लाख रकम बराबरको १ सय रुपैयाँ अङ्कित दरमा प्रिमियम वापत १८८ रुपैयाँ थप गरी जम्मा प्रतिसेयर मूल्य २८८ रुपैयाँमा ११ लाख २५ हजार कित्ता साधारण सेयर सर्वसाधारणहरूलाई बिक्री गर्न लागेको हो । 

वि.सं.२०५४ साल मंसिर २ गते कम्पनी रजिष्ट्रारको कार्यालयमा दर्ता भई सञ्चालित यस अस्पतालले बाग्मती प्रदेश स्वास्थ्य मन्त्रालय, हेटौँडाबाट इजाजतपत्र लिई १०० (एक सय) शैयाको जनरल स्वास्थ्य संस्था/अस्पताल सञ्चालन गर्दै आइरहेको छ ।

अस्पतालले उच्च गुणस्तरीय र किफायती स्वास्थ्य शिक्षा प्रदान गर्ने उद्देश्यले संगठित संस्थाको शतप्रतिशत लगानीमा सहायक कम्पनी ह्याम्स नर्सिङ्ग कलेज २०६५ साल पुस ९ गते देखि प्राविधिक शिक्षा तथा व्यवसायिक तालिम परिषद्बाट स्वीकृती पत्र प्राप्त गरि ३ वर्षे प्रविणता प्रमाण पत्र नर्सिङ्ग कार्यक्रम संचालन गर्दै आईरहेको छ ।