काठमाडौँ / कृषिमा यान्त्रीकरणको अवलम्बन, कृषि कार्यमा परिवर्तन’ भन्ने मूल नारासाथ नेपालमै पहिलो पटक प्रादेशिक कृषि यन्त्र र प्रविधि सम्बन्धी वृहत प्रदर्शनी हुने भएको छ । पोखरा प्रदर्शनी केन्द्र, नयाँ बजार, पोखरामा गण्डकी प्रदेशस्तरीय प्रदर्शनी यही पुस २० देखि २२ गतेसम्म हुने भएको छ ।

प्रदर्शनी बिहान १० देखि बेलुका ५ बजेसम्म सञ्चालन हुनेछ । नेपाल कृषि मेशिनरी व्यवसायी संघ (नामिया)ले यसअघि राष्ट्रियस्तरमा कृषि यन्त्र र प्रविधिसम्बन्धी एक्स्पो गर्दै आएको थियो । यस पटकदेखि प्रादेशिकस्तरमा पनि एक्स्पोको सुरुवात गरिएको नामियाको अध्यक्ष कृष्ण शर्माले जानकारी दिए । 

एकै थलोमा आधुनिक प्रविधि, विभिन्न कृषि औजार र उपकरण र यन्त्र तथा सेवाहरूकाबारे जानकारी गराउने, नीति निर्माता तथा उपभोक्ताहरुलाई कृषि यान्त्रीकरण प्रविधिसम्बन्धी चेतना जगाउने, प्रविधिको प्रवर्द्धनमा योगदान पुर्याउने र कृषि यान्त्रीकरण प्रविधि तथा सेवाको आन्तरिक बजारको विकास गर्ने जस्ता उद्देश्य आयोजकले लिएको छ । 

त्यसैगरी कृषियन्त्र, उपकरणहरूको प्रवर्द्धनमा वृद्धि भई कृषि यान्त्रीकरणमा सहयोग पुर्याउनु, कृषि यान्त्रीकरण व्यवसायी र उपभोक्ताबिच समन्वय गर्नु, व्यावसायिक कृषि प्रणालीसम्बन्धी चेतना अभिवृद्धि गर्नु तथा लगानीको अवसर सिर्जना गर्नु प्रदर्शनीका अन्य उद्देश्य हुन् । 

प्रदर्शनीमा आधुनिक कृषि, पशुपालन, मत्स्यपालन, पुष्पखेती, व्यवसायिक तरकारी खेती र प्रशोधन तथा बजारीकरणसम्बन्धी आधुनिक यन्त्र, उपकरण तथा प्रविधिका सामाग्री, बीउविजन, आधुनिक सिँचाई लगायत राष्ट्रिय तथा अन्तर्राष्ट्रिय क्षेत्रमा रहेका प्रतिष्ठित कम्पनीहरूको सहभागिता रहनेछ ।

यस प्रादेशिक मेलामा कृषि पूर्वाधार विकास तथा कृषि यान्त्रीकरण प्रर्वद्धन केन्द्र, कृषि विकास निर्देशनालय, गण्डकी र पोखरा महानगरपालिकाले पनि आयोजकको रूपमा  सघाएका छन् । 

त्यसैगरी, ग्रामिण उद्यम तथा आर्थिक विकास आयोजना (रीड), हरिहरभवन, खाद्य तथा पोषण सुरक्षा सुधार आयोजना (फ्यानसेप), हरिहरभवन र नेपाल लाइभ स्टक सेक्टर इनोभेशन आयोजना (एनएलएसआईपी), हरिहरभवन, ललितपुर र राष्ट्रिय कृषि ईन्जिनियरिङ्ग अनुसन्धान केन्द्र, खुमलटार, ललितपुरले पनि यस कार्यक्रममा सहयोगी  रुपमा सहकार्य गरेको छ । 

प्रधानमन्त्री कृषि आधुनिकिकरण परियोजनाले पनि मेलालाई प्रवद्र्धन गर्ने भएको छ ।  प्रदर्शनीमा ६० भन्दा धेरै स्टलहरु रहनेछन् भने करिव ५ करोड रुपैयाँ वरावरको कारोबार हुने अनुमान आयोजकले गरेको छ । कृषक, कृषिकर्मी, उद्यमी, व्यवसायी, कृषिविज्ञ, राजनीतिकर्मी, विद्यार्थी, कर्मचारी लगायत गरी करिव २० हजारले मेलाको अवलोकन गर्ने अनुमान पनि आयोजकले गरेको छ । 

यस प्रादेशिक प्रदर्शनीमा  एस केटि नेपाल प्रा.लि.ले गोल्ड स्पोन्सर रहेको छ भने जि सेभेन एग्रिकल्चर प्रा.लि., मुक्तिनाथ कृषि कम्पनी लिमिटेड, कृषि विकास बैंक लिमिटेडले सिल्भर स्पोन्सर रहेका छन् । सर्भिलियन्स पार्टनरको रुपमा जोधनी ईलेक्ट्रो प्रा।लि रहेको छ । प्रदर्शनीमा प्रबेश निःशुल्क छ ।

पहिलो राष्ट्रिय कृषि यान्त्रीकरण प्रदर्शनी २०७० सालमा चितवनको नारायणगढमा आयोजना भएको थियो । त्यसपछि यो प्रदर्शनी बाँकेको कोहलपुर, काठमाडौंको भृकुटीमण्डप र सुनसरीको धरानमा एकएक पटक तथा चितवनको भरतपुरमा दुई पटक आयोजना भएको छ ।