काठमाडौँ / काठमाडौँ उपत्यकामा पछिल्लो एक हप्ताको अवधिमा तरकारी तथा फलफूलको मूल्य आकाशिएको छ। मुलुकभर लगातार वर्षा भएसँगै बाढीपहिरोका कारण काठमाडौँ उपत्यका भित्रिने राजमार्गहरू अवरूद्ध बनेका कारण तरकारीको मूल्यवृद्धि भएको व्यवसायी बताउँछन्।

सर्वसाधारणको भान्सामा दैनिक उपयोग हुने तरकारीको मूल्य ५०० प्रतिशतसम्म बढेको हो। जसकारण उपत्यकाका उपभोक्ता प्रत्यक्ष मारमा परेका छन्।  कालिमाटी फलफूल तथा तरकारी बजार विकास समितिका अनुसार एक हप्ताको अवधिमा प्रायः सबैजसो हरियो तरकारीको मूल्य बढेका छन्। 

मुलुकभर लगातार वर्षा भएसँगै बाढीपहिरोका कारण काठमाडौँ उपत्यका भित्रिने राजमार्गहरू अवरूद्ध बनेका कारण तरकारीको मूल्यवृद्धि भएको व्यवसायी बताउँछन्। 

विशेषगरी पृथ्वी राजमार्गअन्तर्गत नारायणगढ-मुग्लिन-नौबिसे सडकखण्ड पहिरोका कारण अवरूद्ध भएको छन् । जस कारणले गर्दा उपत्यकामा तरकारी ढुवानी हुन सकेको छैन । 

कुन तरकारी तथा फलफूलको मूल्य कतिले बढ्यो ? 

समितिले सार्वजनिक गरेको बजार मूल्यसुची अनुसार रायो सागको मूल्य ४०३.०४ प्रतिशतसम्म बढेको पाइएको छ । असार २० गतेसम्ममा प्रतिकिलो ५५ रुपैयाँमा कारोबार भएको रायो साग आज अर्थात असार २७ गते २७६.६७ रुपैयाँ प्रतिकिलोमा कारोबार हुने भएको छ । 

यस्तै, तने बोडी २२२.२२ प्रतिशतसम्म बढेको पाइएको । एक हप्ता अघिसम्म प्रतिकिलो ४५ रुपैयाँमा कारोबार भएको तने बोडी आज १४५ रुपैयाँमा कारोबार हुने भएको समितिले जनाएको हो । 

यता, घिउ सिमी (हाइब्रीड) असार २० मा ६५ रुपैयाँमा कारोबार भएकोमा आज २२३.०८ प्रतिशतले बढेर २१० रुपैयाँ, तितो करेला १४४.४४ प्रतिशतले बढेर  ११० रुपैयाँ र परवर (लोकलं) १४२.८६ प्रतिशतले बढेर आज ८५ रुपैयाँ प्रतिकिलोमा कारोबार हुने भएको छ ।