काठमाडौँ / स्थानीय बजारमा सुनको माग घट्दा आयातमा उल्लेख्य गिरावट आएको छ । 

भन्सार विभागले सार्वजनिक गरेको तथ्याङ्क अनुसार गत आर्थिक बर्ष २०८०/८१ मा २३ अर्ब ६५ करोड रुपैयाँ बराबरको सुन आयात भएको छ । विभागको अनुसार गत आर्थिक वर्षमा कुल २ हजार ६५२ किलो सुन आयात भएको छ । 

सुनको मूल्य बढेसँगै आन्तरिक बजारमा खपत न्यून हुँदा आयातमा कमी आएको हो । उपभोक्ताको क्रयशक्ति न्यून हुँदा बजारमा माग पनि कम भएपछि त्यसको असर आयातमा पर्न गएको हो । 

अघिल्लो आर्थिक वर्ष २०७९/८० मा २२ अर्ब ३५ करोड रुपैयाँ बराबरको २ हजार ९१७ किलो सुन आयात भएको थियो । 

सुनको मूल्य निरन्तर बढेर प्रतितोला १ लाख ५० हजार पुगिसकेको छ। जसले गर्दा सुनको व्यापारमा कमी आएको छ । जस कारण  गत वर्ष सुनको आयात थप घटेको देखिन्छ । 

सुनचाँदी व्यवसायी महासंघले सार्वजनिक गरेको मूल्य सुची अनुसार आज बिहिबार नेपाली बजारमा छापावाला सुन एक लाख ४५ हजार रुपैयाँ कारोबार हुने भएको छ भने, तेजाबी सुन आज एक लाख ४४ हजार तीन सय रुपैयाँमा कारोबार हुनेछ । 

विभागको अनुसार आर्थिक वर्ष २०७८/७९ मा कुल ३५ अर्ब ६१ करोड रुपैयाँको सुन आयात भएको थियो भने २०७७/७८ मा २७ अर्ब ३४ करोड सुन आयात भएको थियो। यस्तै आर्थिक वर्ष २०७६/७७ मा भने १३ अर्ब रुपैयाँको मात्रै सुन आयात भएको थियो ।

आर्थिक वर्ष २०७५/७६ मा ३४ अर्ब ६१ करोड रुपैयाँ बराबरको सुन आयात भएको थियो । आर्थिक वर्ष २०७४/७५ मा ३१ अर्ब ७४ करोड रुपैयाँको सुन आयात भएको थियो। आर्थिक वर्ष २०७३/७४ मा २३ अर्ब २३ करोड रुपैयाँको सुन आयात भएको थियो भने आर्थिक वर्ष २०७२/७३ मा साढे १५ अर्ब रुपैयाँ बराबरको सुन आयात भएको थियो ।