काठमाडौँ / नेपालमा अण्डाको मूल्य घटेको छ । नेपाल कुखुरा व्यवसायी मञ्चका अनुसार ठुलो साइजको अण्डा प्रतिक्रेट २० र मध्यम साइजको ३० रुपैयाँले घटेको हो ।
मञ्चका निवर्तमान अध्यक्ष राजेन्द्र लामिछानेका अनुसार असार अन्तिम सातामा ठुलो साइजको अण्डाको मूल्य ५२० रुपैयाँ प्रतिक्रेट रहेको थियो ।
मूल्य घटेसँगै अब अण्डाको मूल्य प्रतिक्रेट ५ सय रुपैयाँ कायम भएको हो । यस्तै, ठुलो साइजको अण्डा पछिल्लो पटक प्रतिक्रेट ५०५ रुपैयाँबाट घटेर ४७५ रुपैयाँमा झरेको छ ।
यस्तै, मध्यम खालको अण्डाको मूल्य ४४५ रुपैयाँ प्रतिक्रेटबाट घटेर ४१५ भएको लामिछानेले बताए । देशभरका किसानसँग छलफल गरेर मूल्य समायोजन गरेको उनको भनाइ छ ।
किसानलाई अण्डा बिक्री गर्न समस्या भएकाले चितवनलाई आधार मानेर अण्डाको मूल्य समायोजन गरिएको मञ्चले जनाएको छ ।
