काठमाडौँ / एनसेलले कुनै पनि इन्टरनेट कम्पनी खरिद नगरेको जनाएको छ । एनसेलले शुक्रबार एक विज्ञप्ति जारी गर्दै इन्टरनेट सेवा प्रदायक कम्पनीको शेयर खरिद गरेको दाबी गर्दै प्रकाशित भएका समाचार अपरिपक्व र अनुमानमा आधारित भएको जनाएको हो ।
एनसेलले ब्रोडब्याण्ड इन्टरनेट सेवा प्रदान गर्ने सोचका साथ बजारमा अवसरहरूको खोजी गरिरहेको हुँदा यस सम्बन्धमा गहन छलफल र मूल्याङ्कनको प्रक्रियाको माध्यमबाट सम्पन्न गर्ने कुरामा भने कम्पनी प्रतिबद्ध रहेको बताएको छ ।
साथै, एनसेलले नेपाल सरकार तथा दूरसञ्चार उद्योगको रणनीतिक उद्देश्यसँग मेल खानेगरी आवश्यक निर्णय हुने कुरा सुनिश्चित गर्नु कम्पनीको लक्ष्य रहेको पनि उल्लेख गरेको छ ।
“एनसेलले नेपालमा बढ्दो डिजिटल इकोसिस्टममा योगदान पुर्याउन निरन्तर कार्य गरिरहेको छ,” एनसेलद्वारा जारी विज्ञप्तिमा भनिएको छ, “आफ्ना सेवाहरु विस्तार गर्दै आम उपभोक्तादेखि व्यापार व्यवसायलाई सशक्त बनाउँदै अन्ततः थप कनेक्टेड र डिजिटल रूपमा समावेशी नेपालको विकासमा योगदान दिन सक्ने कुरामा विश्वस्त रहेको छ ।”
एक जिम्मेवार सेवा प्रदायकको रूपमा, एनसेलले सधैँ पारदर्शिता र सबै सरोकारवालाहरूमाझ सही सूचना प्रवाहलाई प्राथमिकता दिँदै एनसेलको जिकिर छ ।
विकसित घटनाक्रम अनुसार आवश्यक समयमा उपयुक्त जानकारीहरू प्रदान गर्दै जाने पनि एनसेलले बताएको छ।
एनसेलले गर्ने निर्णयहरू सधैँ नेपाल राज्य, ग्राहकवर्ग र सरोकारवालाहरूसँग सम्बन्धी हुने भएकोले एनसेलसँग सम्बन्धित समाचारहरू प्रकाशन, प्रसारण गर्नुअघि हाम्रो आधिकारिक धारणा बुझिदिन सञ्चार माध्यमहरूलाई एनसेलले आग्रहसमेत गरेको छ ।
