काठमाडौँ / नेपाल वायुसेवा निगमले असोज २४ काठमाडौँ–भैरहवा उद्धार उडान गर्ने भएको छ । सोमबार एक विज्ञप्ति जारी गर्दै निगमले अविरल वर्षाका कारण काठमाडौँ उपत्यकाबाट बाहिर जाने÷आउने सडक बाढी र पहिरोले क्षतिग्रस्त भई आवतजावतमा समस्या हुँदा यात्रुलाई सहज होस् भन्ने उद्देश्यले उद्धार उडान गर्ने भएको हो। 

नेपालीहरूको महान् पर्व बडादसैँमा आ–आफ्नो जिल्लास्थित घर आउन र जान यात्रुहरूलाई सहज होस् भनी ब्घद्दण् जहाजबाट उद्धार उडान गर्न लागिएको निगमले जनाएको छ।

संस्कृति, पर्यटन तथा नागरिक उड्डयन मन्त्री बद्री प्रसाद पाण्डेको विशेष निर्देशन र निगमका कार्यकारी अध्यक्ष युवराज अधिकारीको विशेष पहलमा उद्धार उडान गर्न लागिएको निगमद्वारा जारी विज्ञप्तिमा उल्लेख छ । 

निगमका अनुसार सोमबार काठमाडौँबाट भैरहवा बिहान ११ बजे र भैरहवाबाट काठमाडौँ १२ः ३० मा उडान हुनेछ ।

काठमाडौँबाट भैरहवाका लागि एकतर्फी भाडा दर ७ हजार रुपैयाँ र भैरहवाबाट काठमाडौँका लागि ३ हजार ८९० रुपैयाँ लाग्नेछ भने ३० केजी लगेज निःशुल्क लान सक्ने व्यवस्था गरिएको निगमका प्रवक्ता रमेश पौडेलले बताए ।

यात्रुहरूले निगमको आन्तरिक बिक्री कार्यालय वा वेभसाइट तथा मोवाइलबाटसमेत अनलाइन टिकट लिनसक्ने व्यवस्था गरिएको उनले जानकारी दिए।