काठमाडौँ / सिटिजन्स बैंक इन्टरनेसनल लिमिटेडको १८औँ वार्षिक साधारण सभा सम्पन्न भएको छ । बैंक सञ्चालक समितिका अध्यक्ष प्रवल जङ्ग पाण्डेको अध्यक्षतामा सोमबार, अमृतभोग, कालिकास्थान, डिल्लीबजार, काठमाडौँमा बैंकको साधारण सभा सम्पन्न भएको हो ।
सभाले गत आर्थिक बर्ष २०८०/८१ को सञ्चालक समितिको वार्षिक प्रतिवेदन छलफल गरि पारित गरेको छ भने लेखापरीक्षकको प्रतिवेदनसहित २०८१ असार मसान्तको एन.एफ.आर.एस (NFRS) बमोजिम तयार गरिएको वासलात, नाफा नोक्सानीको हिसाव तथा नगद प्रवाह विवरण लगायतका एकीकृत वित्तीय विवरणहरू स्वीकृत गरेको छ ।
त्यस्तै, बैंक सञ्चालक समितिले प्रस्ताव गरेको लाभांश पनि सभाबाट पारित भएको छ । आर्थिक वर्ष २०८०/८१को वितरणयोग्य मुनाफाबाट २०८१ असार मसान्तको चुक्तापुँजी १४ अर्ब २० करोड ९ लाख ७४ हजार रुपैयाँ बराबरको ४ प्रतिशतले हुने ५६ करोड ८० लाख ३८ हजार ९६० बराबरको बोनस शेयर र कर प्रयोजनको लागि नगद लाभांश ०.२१ प्रतिशतले हुने २ करोड ९८ लाख ९६ हजार ७८७ सहित ५९ करोड ७९ लाख ३५ हजार ७ सय ४७/६१ लाभांश दिने प्रस्ताव सर्वसम्मतिबाट पारित भएको बैंकले जनाएको छ ।
सो अवसरमा अध्यक्ष पाण्डेले शेयरधनीहरूबाट प्राप्त सुझाव अनुसार बैंकको काम कारवाही सञ्चालन गर्ने र भविष्यमा बैंकले अझ बढी प्रगति हासिल गर्न सक्ने विश्वास व्यक्त गरे ।
साथै संस्थागत सुशासन तथा अनुपालनाको स्तरलाई उच्चतम राख्ने विषयमा बैंकले सदैव महत्व दिँदै आएको र आगामी दिनहरुमा समग्र बैंकको संस्थागत सुशासन तथा अनुपालनाको अवस्थालाई थप सवल तथा सुदृढ बनाउँदै जानेतर्फ बैंक प्रतिबद्ध रहेको उनले जानकारी दिए ।
सिटिजन्स बैंक इन्टरनेसनल लिमिटेडले देशैभरी ६० जिल्लामा फैलिएका आफ्ना १९७ वटा शाखा, १६२ वटा ए.टि.एम., ३ विस्तारित काउन्टर र ७४ वटा शाखारहित बैंकिङ्ग ईकाइहरुबाट १८ लाख भन्दा बढी ग्राहकहरूलाई आधुनिक बैंकिङ्ग सेवाहरू प्रदान गर्दै आएको छ ।
