काठमाडौँ / हिमालयन बैंकले पुस २९ गतेका ३२औँ वार्षिक साधारण सभाको आयोजना गर्ने भएको छ । बैंकको पुस ७ गते बसेको सञ्चालक समितिको बैठकले काठमाडौँको भद्रकालीस्थित नेपाल आर्मी अफिसर्स क्लबमा बिहान १० बजे साधारण सभा बोलाउने निर्णय गरेको हो ।
बैंकको संस्थापक तथा सर्वसाधरण सेयरधनीको सेयर अनुपात ७०ः३० कायम गर्न सेयर प्रिमियमसहित ९२ लाख ५० हजार ४६९ कित्ता थप सार्वजनिक (एफपिओ) निष्कासन गर्ने प्रस्ताव उक्त सभाले पारित गर्नेछ ।
एफपिओ निष्कासनपछि जारी र चुक्तापुँजीमा वृद्धि हुने भएकाले त्यसअनुसार प्रबन्धपत्र तथा नियमावली संशोधनका लागि सञ्चालक समितिलाई अख्तियारी दिने प्रस्ताव पनि पारित गरिनेछ । बैंकले लाभांशसम्बन्धी कुनै प्रस्ताव पेश गरेको छैन ।
गत आर्थिक वर्ष (आव)को वार्षिक प्रतिवेदन छलफल गरी पारित गर्नुका साथै चालू आवको लागि लेखापरीक्षकको नियुक्ति र निजको पारिश्रमिक निर्धारणको टुङ्गोसमेत साधारणसभाले गर्नेछ ।
साधारण सभा प्रयोजनका लागि पुस १८ गते बुक क्लोज गर्ने बैंकले जानकारी गराएको छ ।
बैंकले आफ्नो सेयरधनीहरूलाई न्यूनतम मौज्दात ५ सय रुपैयाँमा सेयरधनी बचत खाता खोली निःशुल्क डेबिट कार्ड प्रदान गर्ने व्यवस्था गरेको छ । त्यसरी खाता खोल्ने सेयरधनीहरूको लाभांश रकम उक्त खातामा जम्मा गरिनेछ ।
आ.व. २०७९/८० र सोभन्दा अगिाडिको लाभांश तथा बोनस सेयर नलिएका सेयरधनीहरूले हिमालयन क्यापिटल लिमिटेड, कमलादीस्थिति आइटि प्लाजाबाट लिन बैंकले आग्रह गरेको छ ।
