काठमाडौँ / महालक्ष्मी विकास बैंक लिमिटेडले नख्खु खोलामा बाढीले बगाएका दुई जना व्यक्तिहरूको उद्दार गर्ने चणिकलाल तामाङलाई नगदसहित सम्मान गरेको छ ।
असोज ११ गतेदेखि परेको अविरल बर्षासँगै ललितपुर महानगरपालिका वडा न. १३, नख्खुखोलामा आएको बाढीले शनिबार बगाएका २ व्यक्तिहरूको सकुशल उद्दार गर्न सफल तामाङलाई बैंकले एक लाख रुपैयाँ नगदसहित सम्मान गरेको हो । काभ्रे जिल्ला तेमाल गाउँपालिका वडा न. ९ घर भएका ३३ वर्षीय तामाङले राजु शाह र उनको परिवारको सदस्यको उद्दार गरेका थिए ।
आइतबार बैंकको केन्द्रीय कार्यालयमा आयोजित एक कार्यक्रमकाबिच तामाङले जोखिमको बावजुद देखाउनुभएको अदम्य साहस र उहाँको अठोट र तत्परताले शाह र उनको परिवारको सदस्यको सफल उद्दार गर्न सकिएको निष्कर्षका साथ नगदसहित सम्मान गरिएको बैंकले जनाएको छ ।
सो कार्यले विपतको समयमा नागरिक स्तरबाट सुरक्षित रूपमा उद्घार कार्यमा सहभागिता जनाउन समेत हौसला मिल्ने विश्वास बैंकले लिएको छ । साथै बैंकले देशै भरि आएको बाढीपहिरोको कारण ज्यान गुमाएका व्यक्तिहरू प्रति हार्दिक समवेदना व्यक्त गर्दै घाइतेहरूको शिघ्र स्वास्थ्य लाभको कामना समेत गरेको छ ।
‘सबल बैंक, सफल सहकार्य’को नारालाई आत्मसाथ गर्दै नेपाली जनताको घरदैलोमा विगत ३० वर्ष देखि अनवरत रूपले गुणस्तरीय वित्तीय सेवा प्रदान गर्दै आएको यस बैंकको देशभर १०३ शाखा कार्यालयहरू र करिब ८ लाख ग्राहकहरू रहेका छन् ।
