काठमाडौँ / सिडिएस एण्ड क्लियरिङ्ग लिमिटेड (सिडिएससी)को नवनियुक्त प्रबन्ध सञ्चालक प्रविन पन्दाकले पदभार ग्रहण गरेकी छन् । आइतबार बसेको कम्पनीको सञ्चालक समितिको बैठकले कार्यकारी प्रमुखको समेत जिम्मेवारी प्रदान गर्ने गरी प्रबन्ध सञ्चालकमा नियुक्त गरेसँगै उनले बुधबार पदभार ग्रहण गरेकी हुन् ।
सिडिएससीको सञ्चालक समितिका अध्यक्ष कृष्ण बहादुर कार्कीले उनलाई पद तथा गोपनियताको शपथ गराएका थिए । उनले आगामी चार वर्षसम्म सिडिएससी नेतृत्वको सम्हाल्नेछिन् ।
यसअघि नेपाल स्टक एक्सचेञ्ज (नेप्से)मा वरिष्ठ प्रबन्धकको रूपमा कार्यरत उनी सिडिएससीको सञ्चालक समेत रहेकी थिइन् ।
२०६४ सालमा नेप्सेमा छैटौँ तह अधिकृतबाट प्रवेश गरेकी पन्दाक नवौं तहको अधिकृतको जिम्मेवारी सम्हालिरहेको अवस्थामा सिडिएससीमा कार्यकारी प्रमुखको जिम्मेवारी सम्हाल्न पुगेकी हुन् ।
धितोपत्र बजारमा उनको १७ वर्षबढीको अनुभव छ । पन्दाकले सिडिएससीमा समेत प्रभावकारी भूमिका निर्वाह गर्ने विश्वास रहेको कम्पनीले जनाएको छ ।
