काठमाडौँ / साताको अन्तिम कारोबार दिन बिहीबार पनि नेप्से परिसूचकमा सामान्य सुधार आएको छ । बुधबार ५ अङ्कले बढेको बजार आज ४.६३ अङ्कले बढेर २५८६.२३ बिन्दुमा पुगेको हो ।

बुधबार कारोबार रकम ३ अर्बमा सीमित भएकोमा आज बढेर ४ अर्ब ६० करोड ३२ लाख ८२ हजार रुपैयाँ पुगेको छ । बुधबारको तुलनामा परिसूचक सामान्य कम अङ्कले बढेको भए पनि कारोबार रकममा भने सुधार आएको देखिन्छ ।

बुधबार कुल ३१५ कम्पनीको १  करोड ८६ लाख ७०५ कित्ता सेयर खरिदबिक्री भएको छ । बिहीबार १५६ कम्पनीको मूल्य बढेको छ भने ७७ ओटाको घटेको छ । 

त्यस्तै, ११ ओटा कम्पनीको सेयर मूल्य भने स्थिर छ । यो दिन न्यादी हाइड्रोपावर लिमिटेडको सेयर मूल्यमा सकारात्मक सर्किट लाग्यो । 

सामुदायिक लघुवित्त वित्तीय संस्था, सप्तकोशी डेभलपमेन्ट बैंक, सिन्धु विकास बैंक, सुपरमादी हाइड्रोपावर,ग्रीन डेभलपमेन्ट बैंक र कर्पोरेट डेभलपमेन्ट बैंकको सेयर मूल्य ९ प्रतिशतभन्दा बढीले उकालो लाग्यो । 

बिहीबार पनि सपोर्ट माइक्रोफाइनान्सको सेयर मूल्यमा उच्च गिरावट आएको देखिन्छ । यो दिन यस कम्पनीका लगानीकर्ताले प्रतिकित्ता ५.०२ प्रतिशत अर्थात करिब १४६ रुपैयाँले गुमाएका हुन् । त्यस्तै, आज कारोबार रकमका आधारमा प्रभु महालक्ष्मी लाइफ इन्स्योरेन्सको संस्थापक सेयर शीर्ष स्थानमा छ । 

यो कम्पनीको ४६ करोड १७ लाख रुपैयाँबढीको संस्थापक सेयर कारोबार भएको छ भने न्यादी हाइड्रोपवारको २० करोड ७२ लाख रुपैयाँ बढीको कारोबार भएको छ । 

बिहीबार कारोबारमा आएका १३ ओटा उपसमूहमध्ये आज विकास बैंक समूहमा लगानीकर्ताहरूको आकर्षण बढेको देखिन्छ । यो समूहको परिसूचक २.४० प्रतिशतले बढेको छ । 

त्यस्तै, हाइड्रोपावर समूहको परिसूचक १.८७ प्रतिशतले बढेको छ भने वित्त, होटल्स तथा पर्यन, जीवन बिमा, उत्पादन तथा प्रशोधन, म्युचुअल फण्ड र निर्जीबन बिमा समूहको परिसूचक पनि सामान्य बढेको छ । 

यता सबैभन्दा बढी ब्यापार समूहका लगानीकर्ताले गुमाएका छन् । यो समूहको परिसूचक सबैभन्दा बढी २.०३ प्रतिशतले घटेको छ भने अन्य समूहको परिसूचक १.९४ प्रतिशतले घटेको छ ।