काठमाडौँ / सरकारले पटकपटक गरेको पहलका कारण अहिले सिमेन्टको मूल्यमा प्रतिबोरा १५ देखि २५ रुपैयाँसम्म घटेको छ भने, फलामे छडको मूल्य किलोको २ रुपैयाँले झार्ने उद्योगीले तयारी गरिरहेका छन् । 

उद्योग, वाणिज्य तथा आपूर्ति मन्त्री दामोदर भण्डारीको निर्देशनमा वाणिज्य, आपूर्ति तथा उपभोक्ता हित संरक्षण विभाग कारबाहीमा उत्रिएपछि उद्योगीहरूले निर्माण सामग्रीको मूल्य घटाउन तयार भएका हुन् ।

विभागले अनुगमनलाई तिव्रता दिनुका साथै देशभरिका ठुला स्टिल र फलाम उद्योगहरूबाट आफ्नो उत्पादन लागतको विवरण पेस गर्न पत्राचार गरेको छ । यसै समयमा लोडसेडिङ्गको समय घटेका कारण समेत सिमेन्टको मूल्य घटेको हो ।  

वाणिज्य, आपूर्ति तथा उपभोक्ता हित संरक्षण विभागका महानिर्देशक कुमार दहालले भने, “अहिले निर्माण सामग्रीको मूल्य देशभर नै घटिरहेको छ । स्टिलको कच्चा पदार्थ आयात गर्नुपर्ने हुदाँ कम रकम घटे पनि २–३ दिनमै घट्छ । उद्योगीले पेश गरेका वास्तविक लागतको विवरण अध्ययन गरेपछि अधितम खुद्रा बिक्री मूल्य (एमआरपी) तोक्न सजिलो हुन्छ । सबै बस्तुहरूमा एमआरपी अनिवार्य गर्दा अहिलेको भन्दा सहुलियत अवश्य हुन्छ, हामी त्यसका लागी छलफलमा छौँ ।” 

उनले भने, “मूल्यवृद्धि किन गरियो भनेर हामी सूक्ष्म ढंगले अध्ययन गरिरहेका छौँ । हामी वाणिज्यलाई सहजीकरण गर्ने र सँगसँगै उपभोक्ताको पनि हित गर्ने निकाय हौं । त्यसैले उपभोक्ताको अधिकारको ग्यारेन्टी हाम्रो दायित्वमा पर्छ ।” 

देशभरिका सबै उद्योगलाई यही चैत २० गतेभित्र आफ्ना उत्पादनका प्याकेटमा खुद्रा बिक्री मूल्य (एमआरपी) अंकित गर्न निर्देशन दिएको उनको भनाई छ । सिमेन्ट र स्टिल उद्योगहरूबाट उत्पादन लागतको विवरण आइरहेको विभागले जनाएको छ । अहिले जम्मा २६ वटा स्टिल उद्योग तथा ३२ वटा सिमेण्ट उद्योग सञ्चालनमा रहेका छन् । 

केहि दिन अघि अनुगमन गरी कारवाही समेत गरेको विभागले चैत २१ देखि हाम्रो कडा अनुगमन गर्ने जनाएको छ । एमआरपी नलेखिएका सबै वस्तु बरामद गरेर तिनका उत्पादकलाई कारबाही गर्ने विभागको भनाई छ । सिमेण्ट उत्पादक संघका अध्यक्ष रघु नन्दन मारूका अनुसार सिमेन्टको मूल्यमा १५ देखी २५ रुपैयाँसम्म घटेको छ । 

उनले भने, “२ दिनदेखि लोडसेडिङको समय न्यूनीकरण भएको छ । पहिला १२ घण्टा जती लोडसेडिङ हुने गरेकोमा अहिले ७ घण्टामा झरेको छ । त्यसले गर्दा हाम्रो लागत घट्यो र भाउ घटायौँ । अहिले कम्तीमा पनि प्रतिबोरामा १५ रुपैयाँका दरले मूल्य घटेको छ ।” अध्यक्ष मारूले सिमेन्टमा अधितम मूल्य राख्ने विषयले भने उपभोक्ता झनै मारमा पर्ने सक्ने बताएका छन् । 

उनले भने, “बोरामै मूल्य राख्दा देशभरकै एकै मूल्य हुन्छ र दुर्गममा ढुवानीका कारण सोहि अनुसार बढी रकमको एमआरपी लेख्नुपर्छ । मूल्य राख्दा ढुवानी खर्च कम लाग्ने ठाउँका उपभोक्तालाई समस्या हुन्छ । यस विषयमा सरकार संग अझै छलफल गरेर निर्णय लिनुपर्ने देखिन्छ ।”

सिमेन्ट उद्योगहरूले मंसिर यता पटकपटक गरी बोराको २ सय बढी रुपैयाँसम्म बढाएको उपभोक्ताको गुनासो आएपछि उद्योग मन्त्री भण्डारीकै समन्वयमा उद्योगीहरूले मूल्य घटाएका थिए ।